పెళ్లయ్యాక దంపతులు ఇల్లు, పిల్లలు, ఆర్థిక విషయాలు మరియు ఉద్యోగం గురించి గంటల తరబడి మాట్లాడుకుంటారు. కానీ, సెక్స్ లేదా శారీరక సాన్నిహిత్యం గురించి మాట్లాడాల్సి వచ్చినప్పుడు మాత్రం చాలా మంది మౌనం పాటిస్తారు. దీనిని ఒక సామాజిక నిషేధం (Tabu)గా భావిస్తారు. అంతా బానే ఉంది కదా, ఇక దీని గురించి మాట్లాడటం ఎందుకు అని అనుకుంటారు. కానీ ఈ మౌనం కేవలం బెడ్‌రూమ్‌కే పరిమితం కాకుండా, మొత్తం వైవాహిక బంధంపై తీవ్ర ప్రభావం చూపుతుంది.
సెక్స్ గురించి దంపతులు మాట్లాడుకోకపోవడం వల్ల కలిగే నష్టాలు ఇవే:
1. పెరుగుతున్న అపార్థాలు (Misunderstandings)
సెక్స్ విషయంలో కమ్యూనికేషన్ లేనప్పుడు అపార్థాలు తలెత్తుతాయి. ఒక భాగస్వామి అంతా బాగుంది అనుకుంటే, రెండో భాగస్వామి మాత్రం తాము విస్మరించబడ్డామని లేదా తమకు ప్రాధాన్యత లభించడం లేదని భావించవచ్చు. ఏ విషయం స్పష్టంగా చెప్పుకోకపోవడం వల్ల లేనిపోని అనుమానాలు పెరిగి, బంధం బలహీనపడుతుంది.
2. ఆత్మవిశ్వాసం తగ్గడం (Lack of Confidence)
పెళ్లయిన కొత్తలో ఉన్నంత సాన్నిహిత్యం కొన్నేళ్ల తర్వాత లేకపోవచ్చు, ఇది సహజం. అయితే దీని గురించి చర్చించకపోవడం వల్ల ఒక భాగస్వామిలో ఆత్మవిశ్వాసం తగ్గుతుంది. “నేను ఇప్పుడు ఆకర్షణీయంగా లేనా?”, “నా పార్ట్‌నర్ నన్ను ఇష్టపడటం లేదా?” వంటి ఆలోచనలు మొదలవుతాయి. అద్దంలో చూసుకున్నప్పుడు కూడా తమను తాము తక్కువగా అంచనా వేసుకోవడం ప్రారంభిస్తారు.
3. కోరికలు అణచివేయబడటం (Suppressed Desires)
భాగస్వాములు తమ ఇష్టాఇష్టాల గురించి మాట్లాడుకోనప్పుడు, తమ కోరికలను మనసులోనే అణచుకుంటారు. ఇది కాలక్రమేణా నిరాశకు (Frustration) దారితీస్తుంది. ఫలితంగా చిన్న చిన్న విషయాలకే చిరాకు పడటం, గొడవ పడటం జరుగుతుంది. అసలు సమస్య సెక్స్ గురించి అయినప్పటికీ, గొడవలు మాత్రం వేరే విషయాలపై జరుగుతుంటాయి. సమస్య తీవ్రమయ్యాక కానీ అసలు కారణం బయటపడదు.