“సోషల్ మీడియా పోస్ట్ మార్చిన జీవితం!”.. కూలి పని చేసుకునే కుటుంబాన్ని అంతరిక్ష స్థాయికి ఎదిగేలా చేసిన వైరల్ పోస్ట్..!!!

ఉత్తరప్రదేశ్ రాష్ట్రం ఝాన్సీ ప్రాంతానికి చెందిన దంపతులు రాజ్‌కుమార్ శ్రీవాస్ మరియు అతని భార్య కుట్టి దేవి.

సొంతూరిలో వ్యాపారం సరిగా సాగకపోవడంతో ఏర్పడిన ఆర్థిక సంక్షోభాన్ని ఎలా ఎదుర్కోవాలో తెలియక వారు ఇబ్బంది పడ్డారు. ఆ సమయంలో సోషల్ మీడియాలో మధ్యప్రదేశ్‌ రాష్ట్రంలోని పన్నా ప్రాంతంలో వజ్రాలు సులభంగా దొరుకుతాయనే సమాచారాన్ని, సక్సెస్ స్టోరీలను వారు చూశారు. దానిని చూసి ప్రేరణ పొందిన ఆ దంపతులు, వెంటనే తమ అదృష్టాన్ని పరీక్షించుకోవడానికి పన్నా వెళ్లి అక్కడి సర్కోహా గ్రామంలో కొంత భూమిని లీజుకు తీసుకుని చిన్న స్థాయిలో గని తవ్వకాలు ప్రారంభించి వెతకడం మొదలుపెట్టారు.

సుమారు ఆరు నెలల పాటు ఎండను సైతం లెక్కచేయకుండా వారు చేసిన కఠోర శ్రమ చివరకు వారికి భారీ ఫలితాన్ని ఇచ్చింది. తాము లీజుకు తీసుకున్న గనిలో ఇసుకను జల్లెడ పట్టి వెతుకుతుండగా, వారికి వరుసగా వజ్రాలు దొరికాయి. ముఖ్యంగా, గత రెండు రోజుల్లోనే వారికి వివిధ పరిమాణాలలో 5.16 క్యారెట్ల బరువున్న మొత్తం 4 మెరిసే వజ్రాలు లభించాయి. వీటి మార్కెట్ విలువ సుమారు 12 లక్షల రూపాయల వరకు ఉంటుందని అంచనా వేశారు.

తమకు లభించిన ఈ అమూల్యమైన వజ్రాలను ఆ దంపతులు పన్నాలోని అధికారిక డైమండ్ ఆఫీసులో సురక్షితంగా అప్పగించారు. ప్రభుత్వ నిబంధనల ప్రకారం, ఈ వజ్రాలను రాబోయే ప్రభుత్వ వేలంలో ఉంచుతారు. తగిన పన్నులు మరియు రుసుములు మినహాయించగా మిగిలిన మొత్తాన్ని వారికే అందించనున్నారు. లభించిన ఈ ఊహించని డబ్బుతో తమ పిల్లల ఉన్నత విద్య మరియు భవిష్యత్తును మెరుగుపరచడమే కాకుండా, తమ వ్యాపారాన్ని కూడా విస్తరిస్తామని ఆ సంతోషంలో ఉన్న దంపతులు తెలిపారు.