సేలం/ఓమలూరు: విద్యాబుద్ధులు నేర్పే పాఠశాల ప్రాంగణం ఒక్కసారిగా రణరంగంగా మారింది. తోటి ఉపాధ్యాయులు, అభం శుభం తెలియని విద్యార్థుల కళ్లెదుటే ఓ కిరాతకుడు మారణకాండకు ఒడిగట్టాడు. కట్టుకున్న భార్య అని కూడా చూడకుండా కరడుగట్టిన నేరస్థుడిలా వేటకొడవలితో విచక్షణారహితంగా నరికి చంపాడు. తమిళనాడులోని సేలం జిల్లా ఓమలూరు సమీపంలో జరిగిన ఈ ఘోర హత్యోదంతం రాష్ట్రవ్యాప్తంగా పెను సంచలనం సృష్టిస్తోంది.
ఏం జరిగిందంటే?
ఓమలూరు సమీపంలోని ఒక ప్రభుత్వ పాఠశాలలో శ్రీవిద్య అనే మహిళ ఉపాధ్యాయురాలిగా పనిచేస్తున్నారు. సోమవారం మధ్యాహ్నం పాఠశాల విరామ సమయంలో ఆమె సహచర ఉపాధ్యాయులతో కలిసి ఉండగా.. ఆమె భర్త విజయ్ మురుగన్ హఠాత్తుగా అక్కడికి చేరుకున్నాడు. తన వెంట తెచ్చుకున్న వేటకొడవలిని తీసి, అందరూ చూస్తుండగానే శ్రీవిద్యపై విరుచుకుపడ్డాడు.
శ్రీవిద్య ప్రాధేయపడుతున్నా వినకుండా ఆమె మెడ, తలపై విచక్షణారహితంగా నరకడంతో.. ఆమె రక్తపు మడుగులో అక్కడికక్కడే ప్రాణాలు విడిచారు. ఈ భయానక దృశ్యాన్ని చూసిన విద్యార్థులు, తోటి ఉపాధ్యాయులు భయంతో పరుగులు తీశారు.
కుటుంబ కలహాలే కారణమా?
పోలీసుల ప్రాథమిక విచారణ ప్రకారం.. శ్రీవిద్య, విజయ్ మురుగన్ దంపతుల మధ్య గత కొంతకాలంగా తీవ్రమైన కుటుంబ కలహాలు నడుస్తున్నాయి. ఈ గొడవల నేపథ్యంలోనే విజయ్ మురుగన్ ఆమెపై పగ పెంచుకున్నాడని, అందుకే పథకం ప్రకారమే పాఠశాలకు వచ్చి ఈ దారుణానికి ఒడిగట్టాడని పోలీసులు భావిస్తున్నారు.
పోలీసుల గాలింపు.. భయాందోళనలో తల్లిదండ్రులు
ఘటన జరిగిన వెంటనే ఓమలూరు డీఎస్పీ సంజీవ్ కుమార్ తన బృందంతో పాఠశాలకు చేరుకున్నారు. శ్రీవిద్య మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు. హత్య అనంతరం పరారైన నిందితుడు విజయ్ మురుగన్ కోసం పోలీసులు గాలింపు చర్యలు ముమ్మరం చేశారు.
పట్టపగలు, రక్షణ ఉండాల్సిన ప్రభుత్వ పాఠశాల ప్రాంగణంలోనే ఒక ఉపాధ్యాయురాలు హత్యకు గురవ్వడం ఇప్పుడు ఉపాధ్యాయ లోకాన్ని, విద్యార్థుల తల్లిదండ్రులను తీవ్ర భయాందోళనలకు గురిచేస్తోంది. విద్యాసంస్థల్లో భద్రతపై ఈ ఘటన పలు ప్రశ్నలను లేవనెత్తుతోంది.