హాథ్రస్: ఉత్తరప్రదేశ్ రాష్ట్రం హాథ్రస్ జిల్లా హసాయన్ పోలీస్ స్టేషన్ పరిధిలో నాలుగేళ్ల క్రితం జరిగిన ఒక మహిళ హత్య కేసులో సంచలనాత్మక నిజాలు వెలుగుచూశాయి. నిందితుడైన భర్త, అతని స్నేహితుడు చూపించిన ఆధారాల ప్రకారం.. భూమిలో పూడ్చిపెట్టిన సదరు మహిళ అస్థిపంజరం, ఆమె దుస్తులు, తల వెంట్రుకలను పోలీసులు స్వాధీనం చేసుకున్నారు.
పోలీసుల విచారణలో నిందితుడైన భర్త, తన భార్యను తానే దారుణంగా హత్య చేసినట్లు అంగీకరించాడు.
వివరాల్లోకి వెళ్తే.. ఈ కేసు ఏటా జిల్లాలోని అవాగఢ్ కొత్వాలి పోలీస్ స్టేషన్ పరిధికి సంబంధించినది. హత్యకు గురైన మహిళను చంద్రవతిగా గుర్తించారు. పోలీసుల దర్యాప్తులో తేలిన వివరాల ప్రకారం.. సుపైతి గ్రామానికి చెందిన వికేష్ (తండ్రి పేరు తఫేదార్) అనే వ్యక్తి ఫిబ్రవరి 2022లో తన స్నేహితుడితో కలిసి భార్య చంద్రవతిని దారుణంగా హతమార్చాడు. హత్య అనంతరం ఎవరికీ దొరకకూడదనే ఉద్దేశంతో శవాన్ని హాథ్రస్లోని హసాయన్ ప్రాంతంలో ఉన్న నగ్లా విజన్ రోడ్డు, నవాబ్పూర్ గ్రామం సమీపంలోని అడవిలో పెద్ద గోతిని తవ్వి పూడ్చిపెట్టారు.
జేసీబీతో తవ్వి అస్థిపంజరం వెలికితీత:
ఈ ఘోర ఉదంతంపై పక్కా సమాచారం అందుకున్న చంద్రవతి కుటుంబ సభ్యులు గురువారం సాయంత్రం అవాగఢ్ పోలీసులతో కలిసి హసాయన్ కొత్వాలి పోలీస్ స్టేషన్కు చేరుకున్నారు. అవాగఢ్ ఎస్హెచ్ఓ (స్టేషన్ హౌస్ ఆఫీసర్) అఖిలేష్ కుమార్ దీక్షిత్ నేతృత్వంలోని పోలీసు బృందం.. హసాయన్ ఇన్ఛార్జ్ గిరీష్ చంద్ర గౌతమ్ సహకారంతో ఘటనా స్థలానికి చేరుకుని జేసీబీ (JCB) యంత్రంతో తవ్వకాలు జరిపారు.
ఈ తవ్వకాలలో మహిళ అస్థిపంజరం, తల వెంట్రుకలు మరియు ఆమె ధరించిన దుస్తులు లభ్యమయ్యాయి. లభించిన శరీర అవశేషాలను స్వాధీనం చేసుకున్న పోలీసులు పోస్టుమార్టం నిమిత్తం హాథ్రస్ ప్రభుత్వ ఆసుపత్రికి తరలించారు. ఈ కేసులో తదుపరి చట్టపరమైన విచారణ కొనసాగుతుందని పోలీసులు తెలిపారు.
నాలుగేళ్ల క్రితమే అంతం చేసిన భర్త:
హసాయన్ పోలీస్ స్టేషన్ ఇన్ఛార్జ్ గిరీష్ చంద్ర గౌతమ్ మాట్లాడుతూ.. నిందితుడు నాలుగేళ్ల క్రితమే తన స్నేహితుడితో కలిసి భార్యను హత్య చేసి, శవాన్ని నవాబ్పూర్ గ్రామం సమీపంలోని అడవిలో పాతిపెట్టాడని తెలిపారు. నిందితుడు మరియు అతని సహచరుడు చూపిన లొకేషన్ ఆధారంగానే అస్థిపంజరం, ఇతర ఆధారాలను సేకరించినట్లు పేర్కొన్నారు. ఈ ఘోరానికి సంబంధించి అవాగఢ్ పోలీస్ స్టేషన్లో ఇదివరకే కేసు నమోదై ఉందని, తదుపరి చట్టపరమైన చర్యలను అవాగఢ్ పోలీసులు పూర్తి చేస్తారని ఆయన వెల్లడించారు.
Leave a Reply