అబుదాబి: గల్ఫ్ యుద్ధం వల్ల ఎవరికి నష్టం అంటే అది సామాన్య ప్రజలకే. యుద్ధం ఎప్పుడూ పరిష్కారం కాదని అమెరికా గుర్తించనంత కాలం, ప్రపంచవ్యాప్తంగా సామాన్యులు ఇబ్బంది పడటం అనేది ఒక అలిఖిత నియమంగా మారింది.
అమెరికా మరియు ఇజ్రాయెల్ కలిసి ఇరాన్‌పై జరిపిన దాడులు, దానికి ప్రతిగా ఇరాన్ ‘హార్ముజ్ జలసంధి’ని మూసివేయడంతో ప్రస్తుతం మధ్యధరా సముద్ర ప్రాంతంలో సుమారు 3,200 చమురు నౌకలు నిలిచిపోయాయి. వీటిలో 20 వేల మందికి పైగా సిబ్బంది దిక్కుతోచని స్థితిలో చిక్కుకున్నారు. వినడానికి ఆశ్చర్యంగా ఉన్నా.. ఇది చేదు నిజం.
20 వేల మంది సిబ్బంది పరిస్థితి: ప్రపంచంలోనే అతి ముఖ్యమైన సముద్ర రవాణా మార్గమైన హార్ముజ్ జలసంధిని మూసివేస్తున్నట్లు ఇరాన్ ప్రకటించడంతో రవాణా వ్యవస్థ స్తంభించింది. అక్కడ నిలిచిపోయిన ఓడలపై నిరంతరం దాడులు జరుగుతుండటంతో రవాణా పూర్తిగా నిలిచిపోయింది. దీంతో ఆ ఓడల్లో ఉన్న సుమారు 20 వేల మందికి పైగా కార్మికులు ప్రాణభయంతో వణుకుతున్నారు.
నీటి కోసం ఇబ్బందులు: నిలిచిపోయిన 3,200 నౌకల్లోని సిబ్బందికి ఆహార పదార్థాలు నిల్వ ఉన్నప్పటికీ, అత్యవసరమైన తాగునీటి సరఫరా లేక తీవ్ర ఇబ్బందులు పడుతున్నారు. మరోవైపు ఉద్యోగాలు కోల్పోతామనే భయం కూడా వారిని వెంటాడుతోంది. ప్రస్తుత పరిస్థితుల్లో హార్ముజ్ జలసంధిని దాటడానికి ఏ నౌక కూడా ముందుకు రావడం లేదు.
ప్రాణ రక్షణే ముఖ్యం: అంతర్జాతీయ షిప్పింగ్ సిబ్బంది సంక్షేమ సంస్థ మేనేజర్ చిరాగ్ బహ్రీ మాట్లాడుతూ.. “సహాయం కోసం వస్తున్న దరఖాస్తుల్లో మూడింట ఒక వంతు మంది తమ స్వదేశాలకు తిరిగి వెళ్తామని కోరుతున్నారు. బోనస్‌లు, పరిహారం కంటే తమ ప్రాణ రక్షణే ముఖ్యమని వారు భావిస్తున్నారు. ఈ నెల 13వ తేదీ నుండి నౌకలపై జరుగుతున్న దాడుల్లో పలువురు మరణించడం, గాయపడటం వల్ల సిబ్బంది నౌకలను కదిలించడానికి కూడా భయపడుతున్నారు” అని తెలిపారు.
కన్నీళ్లు పెట్టుకున్న నౌక కెప్టెన్: సముద్రం నుండి తీరం కనిపిస్తున్నా, అక్కడికి చేరుకోలేని పరిస్థితిలో ఉన్నామని ఒక నౌక కెప్టెన్ ఆవేదన వ్యక్తం చేశారు. భద్రతా కారణాల దృష్ట్యా తన గుర్తింపును వెల్లడించడానికి నిరాకరించిన ఆయన.. నిత్యం క్షిపణి దాడులు జరుగుతున్నాయని, తామంతా సహాయం కోసం ఎదురుచూస్తున్నామని తెలిపారు. నీటిపై మరియు భూమిపై సాగుతున్న ఈ పోరాటం ఎప్పుడు ముగుస్తుందోనని 20 వేల మంది కార్మికులు వేదనతో ఎదురుచూస్తున్నారు.