మీరు ఎలక్ట్రిక్ కారును కొనాలనుకుంటున్నారా? కానీ, అధిక ధర కారణంగా వెనకాడుతున్నారా? అయితే, మీకోసం ఒక శుభవార్త. హుండాయ్ (Hyundai) తన క్రెటా ఎలక్ట్రిక్ (Creta EV) కోసం కొత్తగా ‘బ్యాటరీ యాజ్ ఏ సర్వీస్’ (BaaS – Battery as a Service) మోడల్ను ప్రవేశపెట్టింది.
ఈ కొత్త విధానం ప్రకారం, కస్టమర్లు కారును మరియు బ్యాటరీని విడివిడిగా కొనుగోలు చేయవచ్చు. దీనివల్ల కారు ప్రారంభ ధర గణనీయంగా తగ్గింది. ఇప్పుడు హుండాయ్ క్రెటా ఎలక్ట్రిక్ ప్రారంభ ఎక్స్-షోరూమ్ ధర ₹10.99 లక్షలుగా ఉంది. బ్యాటరీ ధరను సబ్స్క్రిప్షన్ లేదా ఫైనాన్స్ ప్లాన్ ద్వారా విడిగా చెల్లించాల్సి ఉంటుంది. ఒకేసారి పెద్ద మొత్తంలో డబ్బు ఖర్చు చేయలేని వారికి ఈ ఆఫర్ ఎంతో ఉపయోగకరంగా ఉంటుందని కంపెనీ పేర్కొంది.
BaaS మోడల్లో కస్టమర్ బ్యాటరీ ధరను ఒకేసారి చెల్లించాల్సిన అవసరం లేదు. దానికి బదులుగా వాయిదాలు లేదా సబ్స్క్రిప్షన్ ప్లాన్ను ఎంచుకోవచ్చు. హుండాయ్ ప్రకారం, బ్యాటరీ EMI కిలోమీటరుకు సుమారు ₹3.90 నుండి ప్రారంభమవుతుంది. ఎలక్ట్రిక్ కార్లకు ఉన్న అతిపెద్ద అడ్డంకి ‘ప్రారంభ ధర’ అని గుర్తించి, ఆ సమస్యను అధిగమించేందుకే ఈ కొత్త మోడల్ను తీసుకొచ్చినట్లు కంపెనీ తెలిపింది.
ఇంట్లోనే చార్జింగ్ సులభం క్రెటా ఎలక్ట్రిక్లో కంపెనీ కొన్ని కొత్త ఫీచర్లను కూడా జోడించింది. ఇప్పుడు అన్ని వేరియంట్లలో ఇంటిగ్రేటెడ్ సైడ్ ఫుట్స్టెప్ లభిస్తుంది, దీనివల్ల కారు ఎక్కడం, దిగడం సులభతరమవుతుంది. అలాగే, కస్టమర్ల డిమాండ్ను దృష్టిలో ఉంచుకుని 7.4 kW వాల్ బాక్స్ హోమ్ చార్జర్ను స్టాండర్డ్ ఫీచర్గా అందించారు.
రేంజ్ మరియు చార్జింగ్ క్రెటా ఎలక్ట్రిక్ గతంలో మాదిరిగానే రెండు బ్యాటరీ ఆప్షన్లతో లభిస్తుంది. ఇందులో 42 kWh మరియు 51.4 kWh బ్యాటరీ ప్యాక్లు ఉన్నాయి. 51.4 kWh బ్యాటరీ ప్యాక్ ఒక్కసారి ఫుల్ చార్జ్ చేస్తే 510 కిలోమీటర్ల వరకు రేంజ్ ఇస్తుందని ARAI ధృవీకరించింది. DC ఫాస్ట్ చార్జింగ్ సాయంతో ఈ కారు కేవలం 39 నిమిషాల్లో 10% నుండి 80% వరకు చార్జ్ అవుతుంది. లాంగ్ రేంజ్ వేరియంట్ 0 నుండి 100 కిమీ వేగాన్ని కేవలం 7.9 సెకన్లలోనే అందుకుంటుంది.
బ్యాటరీపై 8 ఏళ్ల వారంటీ ఫీచర్ల విషయానికొస్తే, ఇందులో అత్యాధునిక సాంకేతికతతో కూడిన సౌకర్యాలు ఉన్నాయి. అంతేకాకుండా, బ్యాటరీపై 8 ఏళ్లు లేదా 1.6 లక్షల కిలోమీటర్ల వారంటీని కంపెనీ అందిస్తోంది. దేశవ్యాప్తంగా తన EV చార్జింగ్ నెట్వర్క్ను హుండాయ్ వేగంగా విస్తరిస్తోంది. ‘myHyundai’ యాప్ ద్వారా కస్టమర్లు దేశవ్యాప్తంగా 10,000కు పైగా EV చార్జింగ్ పాయింట్ల వివరాలను పొందవచ్చు.