భారతీయులు తమ ఆహారంలో పాలు మరియు పాల ఉత్పత్తులపై ఎక్కువగా ఆధారపడతారు. పాలలో మన శరీరానికి అవసరమైన కాల్షియం, ప్రోటీన్, కొవ్వు మరియు విటమిన్లు పుష్కలంగా ఉంటాయి. అయితే, ఇంతటి పోషక విలువలున్న పాలు కలుషితమైతే ఏమవుతుందో తెలుసా?
పాలు ఎందుకు కలుషితమవుతాయి? పాలలో సాధారణంగా ‘కోలిఫామ్’ (Coliform) అనే బ్యాక్టీరియా ఉంటుంది. పాలు పితికేటప్పుడు శుభ్రత పాటించకపోవడం, పాత్రలు సరిగ్గా కడగకపోవడం, పాలను ఎక్కువ సేపు వేడి ప్రదేశంలో ఉంచడం వల్ల బ్యాక్టీరియా వేగంగా పెరుగుతుంది. ఇవే కాకుండా సాల్మోనెల్లా, ఈ-కోలి (E. coli) వంటి ప్రమాదకరమైన క్రిములు కూడా పాలలో చేరే అవకాశం ఉంది.
కలుషిత పాల వల్ల కలిగే నష్టాలు:
- పోషకాల లోపం: పాలలో ఉన్న ప్రోటీన్లు, విటమిన్లను బ్యాక్టీరియా తినేయడం వల్ల మనం తాగే పాలు కేవలం తెల్లటి ద్రవంగా మాత్రమే మిగులుతాయి.
- ఫుడ్ పాయిజనింగ్: బ్యాక్టీరియా విడుదల చేసే విషతుల్యాల వల్ల వాంతులు, తలతిరగడం వంటి సమస్యలు వస్తాయి.
- పేగు ఇన్ఫెక్షన్లు: లిస్టీరియా వంటి బ్యాక్టీరియా గర్భిణీ స్త్రీలకు గర్భస్రావం కలిగించేంత ప్రమాదకరమైనది.
పాలను సురక్షితంగా మరిగించే పద్ధతులు:
- పాలు పొంగి రాగానే స్టవ్ ఆపేయకండి. మంట తగ్గించి 2 నుండి 5 నిమిషాల పాటు తక్కువ సెగపై మరిగించాలి. ఇది పాత్ర అడుగున ఉండే బ్యాక్టీరియాను కూడా నాశనం చేస్తుంది.
- పాలను ఒకసారి మాత్రమే వేడి చేయాలి. పదే పదే వేడి చేయడం వల్ల అందులోని బి-కాంప్లెక్స్ విటమిన్లు నశిస్తాయి.
- పాలు కొన్న 15-20 నిమిషాల లోపు వేడి చేయాలి లేదా ఫ్రిజ్‌లో పెట్టాలి.
- పాలు వేడి చేసే ముందు పాల ప్యాకెట్లను బయట శుభ్రంగా కడగాలి.
పాలు పాడైపోయాయని ఎలా గుర్తించాలి?
- పాలు వేడి చేస్తున్నప్పుడు విరిగిపోతే (Curdling), అందులో ఆమ్లత్వం పెరిగి బ్యాక్టీరియా చేరిందని అర్థం.
- పాలు పుల్లటి వాసన లేదా వింత రుచి వస్తుంటే అది పాడైపోయినట్లు గుర్తించాలి.