ప్రతిరోజూ ద్విచక్ర వాహనం (బైక్) పై ప్రయాణించేవారు భద్రత కోసం హెల్మెట్ ధరించడం తప్పనిసరి. అయితే, గంటల తరబడి హెల్మెట్ పెట్టుకోవడం వల్ల తలలో చెమట పట్టి జిడ్డు, చుండ్రు, దురద మరియు జుట్టు రాలడం వంటి సమస్యలు వస్తుంటాయి.
నిజానికి, హెల్మెట్ నేరుగా జుట్టు రాలడానికి కారణం కాదు; సరైన సంరక్షణ లేకపోవడం, అశుభ్రంగా ఉండే హెల్మెట్టే జుట్టు ఊడటానికి ప్రధాన కారణం.
తడి జుట్టుతో లేదా చెమటతో ఉన్నప్పుడే వెంటనే హెల్మెట్ ధరించడాన్ని నివారించాలి. తేమ పెరిగినప్పుడు బ్యాక్టీరియా, ఫంగస్ చేరి తలలో దురదను కలిగిస్తాయి. కాబట్టి, జుట్టు పూర్తిగా ఆరిపోయిన తర్వాతే హెల్మెట్ ధరించాలి. అంతేకాకుండా, తలను ఎక్కువ టైట్ చేయకుండా, అలా అని వదులుగా లేకుండా సరైన సైజు ఉన్న హెల్మెట్ను ఎంచుకుని వాడటం అవసరం.
హెల్మెట్ లోపలి భాగంలో ఉండే స్పంజ్, గుడ్డలలో చెమట, ధూళి చేరడం వల్ల క్రిములు చేరే అవకాశం ఉంది. దాన్ని నివారించడానికి, హెల్మెట్ లైనర్లను వారానికి ఒకసారి ఉతికి ఉపయోగించాలి. లేదా తలకు, హెల్మెట్కు మధ్య ఒక శుభ్రమైన కాటన్ గుడ్డను వాడటం వల్ల చెమటను పీల్చుకుని, రాపిడిని తగ్గించడానికి తోడ్పడుతుంది. దాంతో పాటు, ఇతరుల హెల్మెట్లను వాడటం గానీ, మీ హెల్మెట్ను ఇతరులకు ఇవ్వడం గానీ చేయకూడదు.
బయటకు వెళ్లి వచ్చిన వెంటనే హెల్మెట్ తీసి తలకు కాసేపు గాలి తగలనివ్వాలి. చెమటను శుభ్రమైన టవల్తో మెల్లగా తుడవాలి. రోజూ హెల్మెట్ ధరించేవారు వారానికి 2 నుండి 3 సార్లు మైల్డ్ షాంపూతో తలస్నానం చేసి, కుదుళ్లలోని మురికిని వదిలించాలి. అలాగే, హెల్మెట్ పెట్టుకునే ముందు తలకు గట్టి నూనెలు లేదా జెల్స్ రాయకపోవడం మంచిది.
హెల్మెట్ పెట్టుకోవడం వల్లే శాశ్వత బట్టతల వస్తుందనడానికి ఎలాంటి శాస్త్రీయ ఆధారాలు లేవని పరిశోధనలు చెబుతున్నాయి. కాబట్టి జుట్టు ఊడుతుందనే భయంతో హెల్మెట్ ధరించడం మానకూడదు. సరైన జుట్టు సంరక్షణ, హెల్మెట్ పరిశుభ్రత పాటిస్తూ సురక్షితమైన ప్రయాణం చేయడమే శ్రేయస్కరం. తీవ్రమైన జుట్టు రాలే సమస్య ఉంటే వైద్యుడిని సంప్రదించి సలహా పొందవచ్చు.