నీలగిరి జిల్లా, ఊటీ ప్రభుత్వ వైద్య కళాశాల ఆసుపత్రిలో 45 ఏళ్ల ఓంప్రకాష్ వైద్యుడిగా పనిచేస్తున్నారు. ఈయన వద్ద శిక్షణ పొందుతున్న ఒక నాలుగో సంవత్సరం వైద్య విద్యార్థిని చదువులో వెనుకబడి, తక్కువ మార్కులు తెచ్చుకుంటోంది. దీనిని గమనించిన ఓంప్రకాష్ ఆమెను మందలించారు.
అప్పుడు ఆ విద్యార్థిని తనకు చదువుపై ఆసక్తి కలగడం లేదని, తీవ్రమైన మానసిక ఒత్తిడికి (Stress) గురవుతున్నానని చెప్పింది. దీనిని ఆసరాగా తీసుకున్న ఓంప్రకాష్, ఆమె ఫోన్ నంబర్ తీసుకుని రోజూ మాట్లాడుతూ.. నీ ఒత్తిడికి చికిత్స అందిస్తానని నమ్మబలికారు. అనంతరం, నీకు కౌన్సెలింగ్ ఇవ్వాలని, అందుకు మరికొందరు వైద్యులు ఊటీలోని ఒక ప్రైవేట్ హోటల్‌లో ఉన్నారని చెప్పి ఆమెను అక్కడికి తీసుకెళ్లారు.
అక్కడ ఎవరూ లేని సమయంలో, ఒక గదిలోకి ఆమెను తీసుకెళ్లి లైంగిక వేధింపులకు పాల్పడ్డారు. ఊహించని ఈ పరిణామంతో దిగ్భ్రాంతికి గురైన విద్యార్థిని వెంటనే అక్కడి నుండి తప్పించుకుని, తన తల్లిదండ్రులకు సమాచారం అందించింది. ఆగ్రహించిన తల్లిదండ్రులు ఊటీ సెంట్రల్ పోలీస్ స్టేషన్‌లో ఫిర్యాదు చేశారు.
పోలీసులు కేసు నమోదు చేసి దర్యాప్తు చేయగా, వైద్యుడు విద్యార్థినిపై అఘాయిత్యానికి పాల్పడినట్లు నిర్ధారణ అయింది. దీనితో పోలీసులు డాక్టర్ ఓంప్రకాష్‌పై పోక్సో (POCSO) చట్టం కింద కేసు నమోదు చేసి, అరెస్టు చేసి జైలుకు తరలించారు. ఒక గురువుగా ఉండాల్సిన వైద్యుడే విద్యార్థినిపై లైంగిక దాడికి పాల్పడటం ఆ ప్రాంతంలో కలకలం రేపింది.