టెహ్రాన్: ఇరాన్‌కు వ్యతిరేకంగా అమెరికా-ఇజ్రాయెల్ ‘ఆపరేషన్ ఎపిక్ ఫ్యూరీ’ని ప్రారంభించినప్పటి నుండి, పశ్చిమ ఆసియా మొత్తం మందుపాతరపై కూర్చున్నట్లుగా ఉంది. ప్రపంచ చమురు వ్యాపారానికి జీవనాడి అయిన హోర్ముజ్ జలసంధి ఇప్పుడు యుద్ధ క్షేత్రంగా మారింది.
ఈ ఉద్రిక్తతల వల్ల చమురు ధరలు ఆకాశాన్ని తాకుతున్నాయి. ఇరాన్ ఈ మార్గాన్ని అడ్డుకుంటూ, అప్పుడప్పుడు క్షిపణి దాడులు చేస్తోంది. తాజాగా శనివారం (మార్చి 7) హోర్ముజ్ వద్ద ఇరాన్ మరోసారి భారీ దాడికి పాల్పడటంతో చమురు సరఫరా వ్యవస్థ మళ్లీ చిక్కుల్లో పడింది.
తైల నౌక ‘Louise P’పై దాడి: మార్షల్ ఐలాండ్స్ జెండాతో వెళ్తున్న ‘Louise P’ అనే ఆయిల్ ట్యాంకర్‌ను లక్ష్యంగా చేసుకున్నట్లు ఇరాన్ రివల్యూషనరీ గార్డ్స్ (IRGC) ప్రకటించింది. ఇది ‘ఉగ్రవాద అమెరికా’ ఆస్తి అని ఇరాన్ ఆరోపిస్తోంది. ఈ దాడి కోసం ఒక ‘సూసైడ్ డ్రోన్’ను ఉపయోగించి పర్షియన్ గల్ఫ్ మధ్యలో నౌకను ఢీకొట్టారు.
ప్రపంచానికి ముప్పు: ప్రపంచంలోని 25% సముద్ర చమురు రవాణా ఈ మార్గం గుండానే జరుగుతుంది. గత 8 రోజులుగా ఈ మార్గంపై తమకే నియంత్రణ ఉందని ఇరాన్ వాదిస్తోంది. అమెరికా లేదా ఇజ్రాయెల్‌కు సంబంధించిన ఏ నౌకను ఇక్కడి నుండి వెళ్లనివ్వబోమని IRGC హెచ్చరించింది. ఇప్పటికే ‘Prima’, ‘Skylight’ వంటి నౌకలపై కూడా దాడులు జరగడంతో షిప్పింగ్ కంపెనీలు ఈ మార్గంలో ప్రయాణాలను నిలిపివేస్తున్నాయి.
ట్రంప్ డిమాండ్‌ను తిరస్కరించిన ఇరాన్: అమెరికా అధ్యక్షుడు డొనాల్డ్ ట్రంప్ ఇరాన్ నుండి షరతులు లేని లొంగుబాటును డిమాండ్ చేస్తున్నారు. అయితే ఇరాన్ అధ్యక్షుడు మసూద్ పెజెస్కియాన్ ఈ డిమాండ్‌ను తోసిపుచ్చారు. “అది వారు తమ సమాధి వరకు తీసుకెళ్లే కల మాత్రమే” అని ఆయన ఘాటుగా స్పందించారు. ఓటమిని అంగీకరించే బదులు, పొరుగు దేశాల్లోని అమెరికా స్థావరాలను లక్ష్యంగా చేసుకుంటామని ఇరాన్ హెచ్చరించింది.