కార్పొరేట్ రంగంలో 14 ఏళ్ల అనుభవం ఉన్న ఒక మహిళ, నెలకు ₹5 లక్షల జీతం వచ్చే ఉద్యోగాన్ని ఎందుకు వదులుకోవాల్సి వచ్చిందో వివరిస్తూ చేసిన పోస్ట్ ఇప్పుడు సోషల్ మీడియాలో వైరల్ అవుతోంది.
అధిక జీతం వచ్చే ఆ ఉద్యోగాన్ని ఆమె ఒక “బంగారు పంజరం”గా అభివర్ణించారు. ఆ డబ్బుతో అంతర్జాతీయ ప్రయాణాలు, విలాసవంతమైన జీవితం లభించినప్పటికీ, దానికి ప్రతిఫలంగా 24 గంటలు పనికి అందుబాటులో ఉండాల్సి వచ్చేదని, దీనివల్ల కుటుంబానికి దూరం కావాల్సి వచ్చేదని ఆమె ఆవేదన వ్యక్తం చేశారు. మన జీవనశైలి కోసం చేసే ఖర్చులు పెరగడం (Lifestyle Inflation) అనేది ఒక పెద్ద ఉచ్చు అని, అది మనల్ని నచ్చని ఉద్యోగాల్లోనే బలవంతంగా ఉంచుతుందని ఆమె హెచ్చరించారు.
జోయీతా తన పోస్ట్లో ఏమన్నారంటే: “నేను ఆ ఉద్యోగాన్ని వదిలేయడం ఎందుకు సులభమైందంటే.. నెలకు వచ్చే ఆ ₹5 లక్షలు నాకు ఇష్టం లేని జీవనశైలిని అలవాటు చేశాయి. నేను ఖరీదైన ఆహారం తింటున్నాను, విదేశీ పర్యటనలకు వెళ్తున్నాను.. కానీ వీటన్నింటికీ ఒక షరతు ఉండేది—అదే ఎప్పుడూ పనికి అందుబాటులో ఉండటం. ఆ జీతం నన్ను నా నుండి, నా బిడ్డ నుండి దూరం చేసింది. తదుపరి ప్రమోషన్ కోసం మాత్రమే బతికేలా మార్చేసింది.”
ఆమె ఇంకా కొనసాగిస్తూ.. “నేను స్టేటస్ (అంతస్తు) కొంటున్నాను అనుకున్నాను, కానీ వాస్తవానికి నా శక్తిని హరించే ఒక విషయంపై నా ఆధారపడటాన్ని (Dependence) నేను కొనుక్కున్నాను. అందుకే ఆ హోదా, ఆ డబ్బు లేకుండా నేను ఏంటో తెలుసుకోవాలని ఉద్యోగం వదిలేశాను. అయితే, ఈ నిర్ణయం తీసుకునే ముందే నాకు ఎలాంటి ఈఎమ్ఐలు (EMIs) లేకుండా జాగ్రత్త పడ్డాను” అని తెలిపారు. చివరగా, “మీ జీతం మీకు కొనిచ్చిన వస్తువుల్లో మీకు నిజంగా అవసరం లేనిది ఏంటి?” అని ఆమె నెటిజన్లను ప్రశ్నించారు.
సోషల్ మీడియా స్పందన: జోయీతా ప్రస్తుతం ఏం చేస్తున్నారని ఒకరు ప్రశ్నించగా.. “నేను ఇప్పుడు ఫ్రాక్షనల్ సీఎమ్ఓ (Fractional CMO)గా చేస్తున్నాను, అంటే పూర్తిస్థాయిలో కాకుండా కొన్ని ప్రాజెక్టులకు మాత్రమే పని చేస్తాను” అని ఆమె సమాధానమిచ్చారు.
- “నెలకు ₹5 లక్షల జీతాన్ని వదులుకోవడానికి చాలా ధైర్యం కావాలి” అని ఒక నెటిజన్ ప్రశంసించగా..
- “కేవలం సమయం అడుగుతున్నారని కార్పొరేట్ ఉద్యోగాన్ని తప్పు పట్టలేం. జీవితంలో ఒక్కో దశలో ఒక్కో ప్రాధాన్యత ఉంటుంది” అని మరికొందరు భిన్నాభిప్రాయాలు వ్యక్తం చేశారు.
జోయీతా తన ఇన్స్టాగ్రామ్ ప్రొఫైల్లో తనను తాను ఒక డిజిటల్ కంటెంట్ క్రియేటర్గా పేర్కొంటూ, కెరీర్ గురించి ఎవరూ చెప్పని నిజాలను షేర్ చేస్తున్నారు.