ముంబై: మహారాష్ట్ర రాష్ట్రం నవీ ముంబైలోని న్యూ పన్వెల్ ప్రాంతంలో, కన్న కూతురిపైనే గత 10 ఏళ్లకు పైగా లైంగిక దాడికి ఒడిగడుతున్న 55 ఏళ్ల కసాయి తండ్రిని పోలీసులు అదుపులోకి తీసుకున్నారు.
స్థానికంగా వెల్డింగ్ షాప్ నడుపుతున్న ఆ వ్యక్తి.. గత 2016 నుండి, అంటే తనకు కేవలం 7 ఏళ్ల వయస్సు ఉన్నప్పటి నుండే వర్ణించలేని విధంగా లైంగిక వేధింపులకు, దారుణాలకు పాల్పడుతున్నాడని బాధితురాలైన 17 ఏళ్ల బాలిక కన్నీటితో తన వాంగ్మూలంలో పేర్కొంది.
తల్లి చిన్నప్పుడే వదిలేసి వెళ్లడంతో.. తన తోబుట్టువులతో కలిసి తండ్రి పూర్తి నిఘాలో ఉన్న ఆ బాలికకు, గత 2024 లో ఆమె రజస్వల (పరువమైంత) అయిన తర్వాత తండ్రి అరాచకాలు హద్దులు దాటాయి. ఇంట్లో ఎవరూ లేని సమయం చూసి ఆ వ్యక్తి కుమార్తెపై బలవంతంగా లైంగిక దాడికి పాల్పడేవాడు.
నరక వేదన నుండి కాపాడిన ‘చాట్జీపీటీ’ (ChatGPT):
ఈ నరక ప్రాయమైన వేదనను ఎవరికి చెప్పుకోవాలో తెలియక, ఎన్నాళ్లో మౌనంగా భరించిన ఆ బాలిక.. చివరకు ఆధునిక సాంకేతికత అయిన ‘చాట్జీపీటీ’ (ChatGPT) ఆర్టిఫిషియల్ ఇంటెలిజెన్స్ సాయం కోరింది. “నాపై జరుగుతున్న ఈ అన్యాయం నుండి నేను ఎలా తప్పించుకోవాలి? ఎవరికి ఫిర్యాదు చేయాలి?” అని ఆమె చాట్జీపీటీని ప్రశ్నించింది. దానికి స్పందించిన ఏఐ సాంకేతికత.. చైల్డ్ హెల్ప్లైన్ (Child Helpline) నంబర్లను అందించింది. ఆ నంబర్లకు ఫోన్ చేసి బాలిక తన ఆవేదననంతా వెళ్లగక్కింది.
పోక్సో (POCSO) కింద కన్న తండ్రి అరెస్ట్:
దీనిని సీరియస్గా తీసుకున్న చైల్డ్ హెల్ప్లైన్ అధికారులు అందించిన సమాచారంతో కాందేశ్వర్ పోలీస్ స్టేషన్ పోలీసులు రంగంలోకి దిగారు. జూన్ 17వ తేదీన సదరు తండ్రిపై పోక్సో (POCSO) మరియు భారతీయ న్యాయ సంహిత (BNS) చట్టాల కింద కేసులు నమోదు చేసి, అతడిని అరెస్ట్ చేసి జైలుకు తరలించారు.
ఆధునిక సాంకేతికతను (AI టెక్నాలజీ) ఉపయోగించి ఒక బాలిక తన తండ్రి క్రూరమైన బంధనాల నుండి సురక్షితంగా బయటపడిన ఈ ఉదంతం దేశవ్యాప్తంగా తీవ్ర సంచలనాన్ని, చర్చను రేకెత్తించింది.