ఢిల్లీలోని సంపన్న ప్రాంతమైన ద్వారకలో జరిగిన ఒక ఘోర ప్రమాదం, ధనికుల నిర్లక్ష్యపు వేగాన్ని మరియు వ్యవస్థలోని లోపాలను మరోసారి ఎత్తిచూపింది. ఒక ఒంటరి తల్లి (Single Mother) 23 ఏళ్ల పాటు అల్లారుముద్దుగా పెంచుకున్న కొడుకును, ఒక మైనర్ చేసిన నిర్లక్ష్యం నిమిషాల వ్యవధిలోనే బలితీసుకుంది.
ఘటన వివరాలు: రీల్స్ చేయడం కోసం మితిమీరిన వేగంతో వెళ్లాలనే సరదా, 23 ఏళ్ల సాహిల్ ధన్‌షేరా ప్రాణాలను బలితీసుకుంది. “ప్రమాదం జరిగిన తర్వాత నా కొడుకు సుమారు 10 నిమిషాల పాటు రోడ్డుపైనే పడి సాయం కోసం విలవిలలాడాడు. అక్కడ జనం ఉన్నా, అంబులెన్స్ ఉన్నా ఎవరూ పట్టించుకోలేదు. నేను అక్కడికి చేరుకుని ఆసుపత్రికి తీసుకెళ్లేలోపే సాహిల్ ఊపిరి ఆగిపోయింది” అని సాహిల్ తల్లి ఇన్నా మాకన్ ఆవేదన వ్యక్తం చేశారు.
నిబంధనలను తుంగలో తొక్కిన ‘కిల్లర్’ స్కార్పియో: తనిఖీల్లో వెల్లడైన విషయాలు దిగ్భ్రాంతిని కలిగిస్తున్నాయి. సాహిల్ ప్రాణాలు తీసిన ఆ స్కార్పియో (Scorpio-N) కారుపై ఇప్పటికే ఓవర్ స్పీడింగ్ కారణంగా 13 చలాన్లు పెండింగ్‌లో ఉన్నాయి. ప్రమాద సమయంలో కారు నడుపుతోంది ఒక మైనర్. అతనికి లైసెన్స్ లేదు, కనీసం డ్రైవింగ్ అవగాహన కూడా లేదు. సోషల్ మీడియా కోసం స్పీడ్ రీల్స్ చేస్తూ ఈ ఘోరానికి ఒడిగట్టారు.
న్యాయం కోసం పోరాటం: ఒకవైపు తన కొడుకు చితికి నిప్పుపెట్టిన బాధలో తల్లి ఉంటే, మరోవైపు నిందితుడికి బోర్డు పరీక్షల సాకుతో మధ్యంతర బెయిల్ లభించడం ఆమెను మరింత కుంగదీసింది. కఠిన శిక్ష విధించి, తమకు న్యాయం చేయాలని ఆమె సోషల్ మీడియా వేదికగా పోలీసులను, ప్రజలను కోరుతున్నారు.