ఇండోర్: మధ్యప్రదేశ్‌లోని ఇండోర్‌లో మురుగునీరు తాగునీటిలో కలవడంతో సంభవించిన విషాదంలో ఆరు నెలల పసికందు కూడా ప్రాణాలు కోల్పోయింది. భాగీరథ్‌పురాలోని మరాఠీ మొహల్లాకు చెందిన దంపతుల కుమారుడు అవ్యాన్ సాహు ఈ దుర్ఘటనలో మరణించాడు.
పదేళ్ల సుదీర్ఘ నిరీక్షణ తర్వాత ఆ దంపతులకు కలిగిన ఏకైక సంతానం అవ్యాన్. తల్లికి పాలు సరిపోకపోవడంతో, ప్యాకెట్ పాలను పైపు ద్వారా వచ్చే నీటిలో కలిపి బిడ్డకు పట్టేవారు. ఆ నీరు కలుషితం కావడంతో, పాలు తాగిన వెంటనే చిన్నారికి తీవ్రమైన వాంతులు, విరేచనాలు అయ్యాయి. పరిస్థితి విషమించడంతో డిసెంబర్ 29న ఆ చిన్నారి మృత్యువుతో పోరాడి ఓడిపోయింది.
ఆర్థిక సాయం తిరస్కరణ
కలుషిత నీరు తాగి మరణించిన వారి కుటుంబాలకు మధ్యప్రదేశ్ ప్రభుత్వం ₹2 లక్షల చొప్పున పరిహారం ప్రకటించింది. అయితే, అవ్యాన్ కుటుంబం ఈ ఆర్థిక సాయాన్ని సున్నితంగా తిరస్కరించింది. “మా బిడ్డ ప్రాణానికి ఈ డబ్బు ఏ విధంగానూ సాటి రాదు” అని వారు ఆవేదన వ్యక్తం చేశారు.
రాజకీయ దుమారం
ఈ ఘటనపై కాంగ్రెస్ నేత రాహుల్ గాంధీ తీవ్రంగా స్పందించారు. ప్రభుత్వం ప్రజలకు నీటిని కాదు, విషాన్ని సరఫరా చేస్తోందని, ఇది ముమ్మాటికీ ప్రభుత్వ నిర్లక్ష్యమేనని ఆయన విమర్శించారు. దీనిపై ముఖ్యమంత్రి మోహన్ యాదవ్ అత్యవసర సమావేశం ఏర్పాటు చేసి, మున్సిపల్ కార్పొరేషన్ మరియు జలమండలి అధికారులను సస్పెండ్ చేయాలని ఆదేశించారు. బిజెపి సీనియర్ నేత ఉమాభారతి కూడా స్వంత ప్రభుత్వంపైనే విమర్శలు గుప్పించడంతో ప్రభుత్వం ఆత్మరక్షణలో పడింది.
అధికారుల నిర్లక్ష్యం
తమకు సరఫరా అవుతున్న నీరు దుర్వాసన వస్తోందని, అందులో యాసిడ్ లాంటి పదార్థం ఉన్నట్లు అనిపిస్తోందని స్థానికులు ముందే ఫిర్యాదు చేసినప్పటికీ, అధికారులు పట్టించుకోలేదని ఆరోపణలు వెల్లువెత్తుతున్నాయి. అధికారుల ఈ నిర్లక్ష్యమే ఒక పసికందుతో సహా మరికొందరి ప్రాణాలను బలితీసుకుంది.