పంజాబ్‌లోని లూధియానాలో ఘోర రోడ్డు ప్రమాదం జరిగింది. వేగంగా దూసుకొచ్చిన ఓ ఎలక్ట్రిక్ కారు.. వరుసగా పలు వాహనాలను ఢీకొట్టడంతో ఐదుగురు తీవ్రంగా గాయపడ్డారు. ఈ ప్రమాదానికి సంబంధించిన భయానక సీసీటీవీ దృశ్యాలు ప్రస్తుతం సోషల్ మీడియాలో వైరల్ అవుతున్నాయి.
లూధియానాలోని బహదూర్ కే రోడ్డులో నిన్న సాయంత్రం ఈ ప్రమాదం జరిగినట్లు సమాచారం.
తెల్ల రంగు టాటా టియాగో ఈవీ కారు అత్యంత వేగంగా దూసుకొచ్చింది. డ్రైవర్ కారుపై నియంత్రణ కోల్పోవడంతో.. మొదట ఓ సైకిల్‌ను ఢీకొట్టింది. ఆ తర్వాత ఓ మోటార్‌సైకిల్‌తో పాటు వరుసగా ఈ-రిక్షాలను ఢీకొట్టింది.
మోటార్‌సైకిల్‌ను కారు ఢీకొట్టిన వేగం చాలా తీవ్రంగా ఉండటంతో.. బైక్‌పై ఉన్న వ్యక్తి గాల్లోకి ఎగిరిపోయాడు. సుమారు 10 నుంచి 15 అడుగుల ఎత్తులో పలుమార్లు గాల్లోనే తిరుగుతూ కింద పడిపోయాడు. ఈ ఘటనకు సంబంధించిన దృశ్యాలు ఒళ్లు గగుర్పొడిచేలా ఉన్నాయి.
ఈ ప్రమాదంలో మోటార్‌సైకిల్ కూడా పూర్తిగా ధ్వంసమైంది. కారు అక్కడితో ఆగకుండా ముందుకు దూసుకెళ్లి ఎదురుగా వస్తున్న రెండు ఈ-రిక్షాలు, ఓ యాక్టివా స్కూటర్‌ను కూడా ఢీకొట్టింది.
ఢీకొన్న వేగానికి ఓ ఈ-రిక్షా రోడ్డుపైనే బోల్తా పడిపోయింది. వరుసగా వాహనాలు ఢీకొనడంతో రోడ్డంతా ప్రమాదకర పరిస్థితి నెలకొంది.
ఈ ఘటనలో మొత్తం ఐదుగురు తీవ్రంగా గాయపడినట్లు సమాచారం. క్షతగాత్రులను వెంటనే ప్రభుత్వ ఆసుపత్రికి తరలించారు. జతీందర్ అనే పాదచారికి కాలు విరగడంతో పాటు తలకు తీవ్ర గాయమైనట్లు తెలుస్తోంది.
ప్రమాదం జరిగిన తర్వాత ఆగకుండా వెళ్లిపోయిన కారును స్థానికులు కొంతదూరం వెంబడించారు. చివరకు కారును ఆపి డ్రైవర్‌ను పట్టుకుని పోలీసులకు అప్పగించారు.
డ్రైవర్ మద్యం మత్తులో ఉన్నాడా? లేక మరేదైనా మత్తు పదార్థాన్ని తీసుకున్నాడా? అనే కోణంలో పోలీసులు దర్యాప్తు చేస్తున్నారు. ప్రమాదానికి అసలు కారణం ఏమిటనే దానిపై కూడా విచారణ కొనసాగుతోంది.
Leave a Reply