కారు టైర్ మార్చాలంటే సాధారణంగా మెకానిక్ సహాయం అవసరం. అయితే ఇప్పుడు ఈ పనిని మనుషులతో సంబంధం లేకుండా చేసే అధునాతన రోబో టెక్నాలజీ అందుబాటులోకి వచ్చింది.
అమెరికాలోని శాన్‌ఫ్రాన్సిస్కోకు చెందిన ‘పిట్‌ప్రో ఆటోమేషన్’ అనే స్టార్టప్ సంస్థ, కెనడాలోని కల్గరీ నగరంలోని ఓ టైర్ షాప్‌లో తొలిసారిగా ఈ అధునాతన టైర్ మార్చే రోబోను ఏర్పాటు చేసింది.
ఈ వ్యవస్థలో క్యూబ్ ఆకారంలో ఉన్న రెండు రోబోలు ప్రత్యేక ట్రాక్‌పై కదులుతూ పని చేస్తాయి. సెన్సర్లు, రోబోటిక్ చేతుల సహాయంతో కారు చక్రంలోని నట్లు తొలగించి, వాటిని భద్రంగా పక్కన ఉంచుతాయి.
ఆ తర్వాత అవసరమైన ప్రక్రియలను పూర్తి చేసి, కేవలం 15 నిమిషాల్లో పూర్తి టైర్ మార్పు పనిని ఈ రోబో పూర్తి చేయగలదని కంపెనీ చెబుతోంది.
ఉద్యోగాలు పోతాయా?
ఈ టెక్నాలజీ అందుబాటులోకి రావడంతో మెకానిక్స్ ఉద్యోగాలకు ముప్పు వస్తుందా అనే ప్రశ్న కూడా తలెత్తుతోంది.
అయితే టైర్ మార్చే పని శారీరకంగా చాలా కష్టంగా ఉండటంతో, ఈ రంగంలో సరైన సిబ్బందిని నియమించుకోవడమే ప్రస్తుతం పెద్ద సవాలుగా ఉందని పిట్‌ప్రో ఆటోమేషన్ వ్యవస్థాపకుడు జెరెమీ కాన్రాడ్ తెలిపారు.
ఒక టైర్ షాప్ మేనేజర్ తనతో మాట్లాడుతూ.. తమ షాప్‌కు ఎదురుగా ఓ ఫాస్ట్‌ఫుడ్ రెస్టారెంట్ ప్రారంభమైన తర్వాత, తమ సిబ్బందిలో సగం మంది ఉద్యోగాలు వదిలి అక్కడికి వెళ్లిపోయారని చెప్పినట్లు ఆయన వెల్లడించారు.
కెనడా మార్కెట్‌పై ఫోకస్
ఈ రోబోటిక్ టెక్నాలజీని భవిష్యత్తులో మరిన్ని చైన్ టైర్ షాపుల్లో విస్తరించాలని పిట్‌ప్రో ఆటోమేషన్ లక్ష్యంగా పెట్టుకుంది.
ముఖ్యంగా ఒకే తరహా నిర్మాణం, పరికరాలు ఉన్న చైన్ షాపుల్లో ఈ వ్యవస్థను అమలు చేయడం సులభంగా ఉంటుందని కంపెనీ భావిస్తోంది.
అలాగే, కెనడాలో శీతాకాలం ప్రారంభం కావడానికి ముందు, ముగిసిన తర్వాత వాహనాలకు టైర్లు మార్చే డిమాండ్ ఎక్కువగా ఉంటుంది. దీంతో ప్రస్తుతం కెనడా మార్కెట్‌పైనే కంపెనీ ప్రత్యేకంగా దృష్టి పెట్టింది.
మొత్తానికి.. టైర్ మార్చే పనిలో రోబోటిక్ టెక్నాలజీ ప్రవేశించడం ఆటోమొబైల్ రంగంలో మరో ఆసక్తికరమైన మార్పుగా మారుతోంది.
Leave a Reply