ఉత్తరప్రదేశ్ రాజధాని లక్నోలో జరిగిన ఈ ఘటన సమాజాన్ని విస్తుపోయేలా చేసింది. కన్న తల్లిదండ్రులు బాధితురాలికి అండగా ఉండాల్సింది పోయి, నిందితుడైన కొడుకుకే వత్తాసు పలకడం ఈ కేసులో మరో విషాదం.
ఏం జరిగింది? లక్నోలోని పారా పోలీస్ స్టేషన్ పరిధిలో ఒక యువతిపై ఆమె సొంత అన్నే పలుమార్లు అత్యాచారానికి పాల్పడ్డాడు. ఈ విషయం తెలిసినా తల్లిదండ్రులు బాధితురాలిని బెదిరించి నోరు మూయించారు. ఆమెకు వేరే వ్యక్తితో వివాహం నిశ్చయించి ఏప్రిల్లో పెళ్లి చేశారు. అయితే, పెళ్లికి 15 రోజుల ముందు కూడా ఆ అన్న తన చెల్లెలిపై బలవంతంగా అత్యాచారానికి పాల్పడి, “కొద్ది రోజుల్లోనే నీకు పెళ్లి కదా, ఎవరికీ ఏమీ తెలియదు” అని భయపెట్టాడు.
అసలు నిజం ఎలా బయటపడింది? పెళ్లైన కొద్దిరోజులకే బాధితురాలికి ఆరోగ్యం పాడవ్వడంతో, భర్త ఆమెను డాక్టర్ వద్దకు తీసుకెళ్లాడు. పరీక్షల్లో ఆమె 5 వారాల గర్భిణి అని తేలడంతో భర్త, అత్తమామలు షాక్కు గురయ్యారు. జరిగిన విషయాన్ని బాధితురాలు తన భర్తకు వివరించింది. సొంత అన్నే తనపై అఘాయిత్యానికి పాల్పడ్డాడని, తల్లిదండ్రులు కూడా అతడినే సమర్థించారని చెప్పడంతో భర్త, అత్తమామలు చలించిపోయారు.
పోలీసుల చర్య: బాధితురాలిని అత్తమామలు, భర్త ధైర్యపరిచి ఆమెతో పోలీస్ స్టేషన్లో ఫిర్యాదు చేయించారు. బాధితురాలి ఫిర్యాదు మేరకు నిందితుడైన అన్నను పోలీసులు అరెస్టు చేశారు. బాధితురాలిని బెదిరించిన తల్లిదండ్రులపై కూడా కేసులు నమోదు చేశారు. నిందితుడు బుద్దేశ్వర్ చౌక్ వద్ద ఉన్న మాంసం దుకాణంలో పని చేస్తున్నట్లు పోలీసులు తెలిపారు.