ఢిల్లీలో 15 ఏళ్ల క్రితం జరిగినట్లు చెబుతున్న భారీ నగల మోసం కేసులో పరారీలో ఉన్న ఇద్దరు సోదరులను క్రైమ్ బ్రాంచ్ పోలీసులు పశ్చిమ బెంగాల్‌లో అరెస్టు చేశారు.
పింటు కోలే, మింటు కోల్ అనే వీరిద్దరూ 2009లో ఢిల్లీకి వచ్చారని, అక్కడ ఆభరణాల తయారీ, డిజైనింగ్ పనుల్లో పని చేస్తున్నారని పోలీసులు తెలిపారు. ఆ తర్వాత ఒక పెద్ద నగల వ్యాపారి దగ్గర పనికి చేరి, ఆయన నమ్మకాన్ని చూరగొన్నారని చెబుతున్నారు. ఆ నమ్మకాన్ని ఆసరాగా చేసుకుని భారీ స్థాయిలో నగలను అపహరించారని వీరిద్దరిపై ఆరోపణలు వచ్చాయి.
పోలీసుల సమాచారం ప్రకారం, నగల వ్యాపారి నమ్మకాన్ని పూర్తిగా పొందిన తర్వాత, వీరిద్దరూ ఒకరోజు సుమారు 1,430 గ్రాముల (1.4 కిలోల) బంగారం, 560 క్యారెట్ల వజ్రాలతో పరారైనట్లు ఆరోపణలు ఉన్నాయి. ఈ ఘటనకు సంబంధించి 2011లో కేసు నమోదు చేసినప్పటికీ, అప్పట్లో వారిని అరెస్టు చేయలేకపోయారు. దీంతో 2012లో వీరిద్దరినీ పట్టుకోవడానికి సమాచారం ఇచ్చిన వారికి తలా రూ.10 వేల చొప్పున రివార్డు కూడా ప్రకటించినట్లు పోలీసులు తెలిపారు. చాలా కాలంగా వీరిద్దరూ పోలీసులకు చిక్కకుండా పరారీలో ఉన్నట్లు తెలుస్తోంది.
ఈ నేపథ్యంలో, వీరిద్దరూ పశ్చిమ బెంగాల్‌లోని హుగ్లీ ప్రాంతంలో నివసిస్తున్నట్లు ఢిల్లీ క్రైమ్ బ్రాంచ్ పోలీసులకు పక్కా సమాచారం అందింది. ఆ సమాచారం ఆధారంగా పోలీసులు అక్కడికి వెళ్లి దర్యాప్తు చేసి, ఇద్దరినీ అరెస్టు చేశారు. హుగ్లీ, కోల్‌కతా ప్రాంతాల్లోని నగల వ్యాపారుల కోసం వీరు ఆభరణాలు తయారు చేస్తున్నట్లు విచారణలో తేలిందని పోలీసులు వెల్లడించారు. దాదాపు 15 ఏళ్ల తర్వాత వీరిద్దరినీ అరెస్టు చేయడం ఈ కేసులో కీలక మలుపుగా భావిస్తున్నారు.
అరెస్టు చేసిన ఇద్దరినీ పోలీసులు తీవ్రంగా విచారిస్తున్నారు. ఇన్ని సంవత్సరాలుగా వారు ఎక్కడెక్కడ తలదాచుకున్నారు, అపహరించిన ఆ భారీ నగలు ఏమయ్యాయి, ఈ ఘటనలో ఇంకా ఎవరికైనా సంబంధం ఉందా అనే కోణంలో దర్యాప్తు కొనసాగుతోంది. కోర్టులో హాజరుపరచబడిన వీరిద్దరినీ న్యాయమూర్తి ఆదేశాల మేరకు జైలుకు తరలించారు. ఏళ్లుగా అపరిష్కృతంగా ఉన్న నగల మోసం కేసులో, పరారీలో ఉన్న ఇద్దరు సోదరులు ఇప్పుడు పట్టుబడటం తీవ్ర కలకలం రేపుతోంది.
Leave a Reply