ప్రపంచంలోనే అతిపెద్ద గోల్డ్ రిఫైనరీ ‘వాల్కంబి ఎస్ఏ’ (Valcambi SA)ను సొంతం చేసుకున్న భారతీయ సంస్థ ‘రాజేష్ ఎక్స్పోర్ట్స్ లిమిటెడ్’లో భారీ ఆర్థిక మోసం వెలుగుచూసింది.
ఏం జరిగింది? సెబీ (SEBI) చేపట్టిన ప్రాథమిక దర్యాప్తులో, రాజేష్ ఎక్స్పోర్ట్స్ సంస్థ తన ఆదాయ గణాంకాలను తప్పుగా చూపినట్లు తేలింది. ఈ నేపథ్యంలో సెబీ తీవ్ర నిర్ణయం తీసుకుంది. సంస్థ చైర్మన్ మరియు మేనేజింగ్ డైరెక్టర్ (CMD) రాజేష్ మెహతాపై, తదుపరి ఆదేశాలు వచ్చే వరకు కంపెనీ షేర్లలో ఎటువంటి ట్రేడింగ్ చేయకుండా నిషేధం విధించింది.
కుంభకోణం ముఖ్యాంశాలు:
- అబద్ధపు లెక్కలు: 2021 నుండి 2025 ఆర్థిక సంవత్సరాల మధ్య కాలంలో, తన అనుబంధ సంస్థల ద్వారా వచ్చే ఆదాయాన్ని భారీగా పెంచి చూపినట్లు సెబీ గుర్తించింది.
- భారీ మొత్తం: కంపెనీ తన మొత్తం ఆదాయంలో సుమారు 99.8% అనగా, దాదాపు 15.2 లక్షల కోట్ల రూపాయలను తప్పుడు మరియు తప్పుదారి పట్టించే గణాంకాలుగా చూపింది.
- పెట్టుబడుల నాటకం: 2023 ఆర్థిక సంవత్సరంలో ఆఫ్రికాలోని గోల్డ్ మైన్స్లో రూ. 1,035 కోట్ల పెట్టుబడి పెట్టినట్లు కంపెనీ ప్రకటించింది. కానీ, సెబీ విచారణలో అలాంటి పెట్టుబడి ఎక్కడా నమోదు కాలేదని, అదంతా కేవలం అబద్ధమని తేలింది.
- పెట్టుబడిదారుల మోసం: కంపెనీ ఆర్థిక స్థితిని బలంగా చూపించి, ఇన్వెస్టర్లను తప్పుదారి పట్టించేందుకు ఈ ఫ్రాడ్ చేసినట్లు దర్యాప్తులో వెల్లడైంది.
తదుపరి చర్యలు: సెబీ ఈ కేసులో నేషనల్ ఫైనాన్షియల్ రిపోర్టింగ్ అథారిటీ (NFRA)కి నివేదికను పంపింది. కంపెనీకి ఆడిటింగ్ చేసిన వారిపై కూడా కఠిన చర్యలు తీసుకునే అవకాశం ఉంది. కంపెనీ తన అకౌంట్ల తనిఖీకి ఫోరెన్సిక్ ఆడిటర్లతో సహకరించాలని ఆదేశించింది.
రాజేష్ ఎక్స్పోర్ట్స్ ఏమి చేస్తుంది? రాజేష్ ఎక్స్పోర్ట్స్ ప్రపంచంలోనే అతిపెద్ద గోల్డ్ రిఫైనింగ్ మరియు రిటైలింగ్ కంపెనీలలో ఒకటి. స్విట్జర్లాండ్లో ‘వాల్కంబి’ రిఫైనరీని నడుపుతూ, బంగారాన్ని శుద్ధి చేస్తుంది. అలాగే ‘శుభ్ జ్యువెలర్స్’ పేరుతో ఇండియాలో రిటైల్ అవుట్లెట్లను నిర్వహిస్తోంది.