శ్రీనగర్/న్యూఢిల్లీ: కాశ్మీర్ లోయలో భారత భద్రతా బలగాలు చేపట్టిన ఒక సంచలన ఆపరేషన్ దేశవ్యాప్తంగా ప్రకంపనలు సృష్టిస్తోంది. 16 ఏళ్లుగా కంటికి కనిపించకుండా తప్పించుకు తిరుగుతున్న ఒక మోస్ట్ వాంటెడ్ పాకిస్థానీ ఉగ్రవాదిని, అతడికి నీడ కల్పించిన స్థానిక దేశద్రోహులను పోలీసులు ఎట్టకేలకు దెబ్బకొట్టారు. ఈ వార్త వింటే ప్రతి భారతీయుడి గుండె మండిపోవాల్సిందే!
అందరి కళ్లు గప్పి 16 ఏళ్లుగా ఇక్కడే..!
లష్కరే తోయిబా (LeT) టెర్రర్ మాడ్యూల్‌కు చెందిన ఐదుగురు ముఠాను జమ్మూ కాశ్మీర్ పోలీసులు, కేంద్ర సంస్థలు సంయుక్తంగా అరెస్ట్ చేశాయి. ఇందులో ఇద్దరు పాకిస్థానీ కిరాతకులు కాగా, ముగ్గురు కశ్మీరీ లోకల్ మద్దతుదారులు.
- ముఖ్య నిందితుడు: అబ్దుల్లా అలియాస్ అబు హురైరా. ఈ పాకిస్థానీ ఉగ్రవాది 16 ఏళ్ల క్రితం భారత్‌లోకి చొరబడ్డాడు. అప్పటి నుండి ఇక్కడి భద్రతా బలగాలకు చిక్కకుండా తప్పించుకు తిరుగుతున్నాడు.
- శిక్షణ: ఈ 16 ఏళ్లలో ఇతను సుమారు 40 మంది ఉగ్రవాదులకు శిక్షణ ఇచ్చి, వారిని ఉసిగొల్పినట్లు సమాచారం. ఇతనితో పాటు ఉస్మాన్ అలియాస్ ఖుబైబ్ అనే మరో పాక్ ఉగ్రవాది కూడా పట్టుబడ్డాడు.
సొంత దేశానికి వెన్నుపోటు..!
ఈ ఆపరేషన్‌లో ఉగ్రవాదుల కంటే ప్రమాదకరమైన వ్యక్తులు దొరికారు. వారు శ్రీనగర్‌కు చెందిన మొహమ్మద్ నకీబ్ భట్, ఆదిల్ రషీద్ భట్, మరియు గులాం మొహమ్మద్ మీర్. ఈ ముగ్గురు స్థానికులు ఆ పాకిస్థానీ రాక్షసులకు ఇల్లు ఇచ్చి, తిండి పెట్టి, వారికి అన్ని రకాల సమాచారాన్ని అందిస్తూ 16 ఏళ్లుగా కాపాడారు. రాజస్థాన్, హర్యానా సహా దేశవ్యాప్తంగా 19 ప్రాంతాల్లో జరిపిన సోదాల్లో వీరి నెట్‌వర్క్ బయటపడింది.