E20 పెట్రోల్ (20% ఇథనాల్, 80% పెట్రోల్) వాడకం వల్ల కార్లపై ఎలాంటి ప్రభావం ఉండదని మీరు భావిస్తే, ఈ ఘటన మీ ఆలోచనను మార్చవచ్చు. బీహార్కు చెందిన ప్రముఖ యూట్యూబర్ మనీష్ కశ్యప్ ఇటీవల తన ‘టయోటా ఇన్నోవా హైక్రాస్ హైబ్రిడ్’ కారు విషయంలో ఎదురైన సమస్యపై ఒక వీడియోను షేర్ చేశారు.
ఏం జరిగింది? కేవలం 12,000 కి.మీ నడిచిన తన కొత్త కారులో ఫ్యూయల్ సిస్టమ్ సమస్య రావడంతో సర్వీస్ సెంటర్కు వెళ్లాల్సి వచ్చిందని, దీనికి కారణం E20 పెట్రోల్ వాడకమేనని ఆయన ఆరోపించారు. ఈ విషయంలో డీలర్షిప్ బాధ్యత తీసుకోవడానికి నిరాకరించిందని ఆయన వాపోయారు.
మైలేజీ భారీగా తగ్గుదల: సాధారణంగా 17 నుండి 20 కి.మీ మైలేజీ ఇచ్చే ఈ కారు, సమస్య మొదలయ్యాక కేవలం 5 కి.మీ మైలేజీకి పడిపోయిందని మనీష్ కశ్యప్ తెలిపారు. 10,000 కి.మీ వద్ద సర్వీసింగ్ చేయించిన కొద్ది రోజులకే ఇంజిన్లో విపరీతమైన వైబ్రేషన్, శబ్దాలు రావడం మరియు కారు మధ్యలోనే ఆగిపోవడం వంటి ఇబ్బందులు తలెత్తాయని ఆయన పేర్కొన్నారు. ఫ్యూయల్ శాంపిల్ టెస్ట్ చేయించగా, అందులో అంచనా కంటే ఎక్కువ ఇథనాల్ మరియు ఇతర కల్తీలు (Contamination) ఉన్నట్లు తేలిందని ఆయన ఆరోపించారు.
ఈ గందరగోళం ఏమిటి? వీడియోలో కారు ఫ్యూయల్ ట్యాంక్ తీసి, అందులోని ఇంధన నాణ్యతను ఆయన ప్రదర్శించారు. ఫ్యూయల్ ట్యాంక్ నుండి తీసిన వివిధ శాంపిల్స్ రంగు మరియు నాణ్యత ఒకేలా లేవని, వాటిలో స్పష్టంగా మురికి మరియు కల్తీ కనిపిస్తోందని ఆయన వాదించారు.
E20 అనుకూలమైన కారు అయినా సమస్య ఎందుకు? మనీష్ కశ్యప్ తన కారు ఫ్యూయల్ లిడ్ (మూత)పై ‘Up to E20 Petrol’ అని రాసి ఉన్న విషయాన్ని చూపించారు. కారు E20 పెట్రోల్కు అనుకూలమైనది (Compatible) అయినప్పటికీ, ఇన్ని సమస్యలు రావడంపై ఆయన అసహనం వ్యక్తం చేశారు. ప్రభుత్వ విధానాల వల్ల వినియోగదారులపై పడుతున్న భారాన్ని, సాధారణ పెట్రోల్ కూడా అందుబాటులో ఉండాలని ఆయన కేంద్ర మంత్రి నితిన్ గడ్కరీని ఉద్దేశించి ప్రశ్నించారు.
వారంటీపై అనుమానాలు: తాను సుదీర్ఘ కాలం పాటు ఎక్స్టెండెడ్ వారంటీ తీసుకున్నానని, అయితే ఇంధనంలో కల్తీ వల్ల సమస్య వచ్చిందని కంపెనీ చెబితే, మరమ్మతు ఖర్చులు ఎవరు భరిస్తారని ఆయన ప్రశ్నించారు. ఫ్యూయల్ కల్తీ వల్ల సమస్య వస్తే, వారంటీ వర్తించడం కష్టమని సర్వీస్ సెంటర్ సిబ్బంది సూచిస్తున్నట్లు ఆయన వీడియోలో తెలిపారు.