సోషల్ మీడియాలో కొద్ది సెకన్ల పాటు కనిపించి మాయమయ్యే ‘లైక్స్’, ‘వ్యూస్’ కోసం నేటి తరం యువత ఏమైనా చేయడానికి సిద్ధపడటం నిత్యకృత్యంగా మారింది.
ఇటీవల ఇన్‌స్టాగ్రామ్, యూట్యూబ్ వంటి ప్లాట్‌ఫామ్‌లలో ‘ఫోన్ స్టిక్కింగ్’ అనే ప్రమాదకరమైన ట్రెండ్ విపరీతంగా వ్యాపిస్తోంది. ఢిల్లీ మెట్రోలో తీవ్ర వివాదాస్పదమైన ఈ వికృత పోకడ, ఇప్పుడు బెంగళూరులోని ‘నమ్మ మెట్రో’ స్టేషన్లకు కూడా పాకడం నిత్య ప్రయాణికులలో తీవ్ర దిగ్భ్రాంతిని, భయాన్ని కలిగిస్తోంది.
ఈ ట్రెండ్ అనుసరించే కంటెంట్ క్రియేటర్లు.. సక్షన్ మౌంట్లు లేదా జిగురు ఆధారిత పరికరాలను ఉపయోగించి తమ ఖరీదైన మొబైల్ ఫోన్లను కదులుతున్న మెట్రో రైలు వెలుపలి అద్దంపై లేదా డోర్లపై అంటిస్తున్నారు.
ఆ తర్వాత రైలు స్టేషన్ నుండి కదలడం ప్రారంభించగానే.. తాము ఫోన్‌ను రైలులోనే మర్చిపోయినట్లు నటిస్తూ, దాన్ని పట్టుకునేందుకు ప్లాట్‌ఫామ్‌పై వేగంగా పరుగెడుతూ ఒక సినిమాటిక్ దృశ్యాన్ని చిత్రీకరిస్తున్నారు.
సోషల్ మీడియాలో మిలియన్ల కొద్దీ వ్యూస్‌ను ఆకర్షించే ఈ ప్రమాదకర విన్యాసాలు, మెట్రో ప్లాట్‌ఫామ్‌లపై ప్రశాంతంగా ప్రయాణించే సామాన్య ప్రజల భద్రతకు తీవ్ర ముప్పుగా మారుతున్నాయి.
ప్లాట్‌ఫామ్‌లపై రైలు వేగానికి సమానంగా ఏకాగ్రత లేకుండా పరుగెత్తే క్రమంలో, తోటి ప్రయాణికులను ఢీకొట్టి పెద్ద ప్రమాదాలు జరిగే అవకాశం ఉంది. ముఖ్యంగా చిన్నపిల్లలు, వృద్ధులపై వీరు పడితే తీవ్ర ప్రాణాపాయం సంభవించవచ్చు.
అంతేకాకుండా, రైలుకు అతికించిన ఫోన్లు కాస్త పట్టు తప్పి పట్టాలపై పడితే రైలు రాకపోకలకు లేదా ప్రయాణికుల భద్రతకు తీవ్ర అంతరాయం కలగొచ్చు. ఇలాంటి బాధ్యతారహిత చర్యలకు పాల్పడే వారిపై మెట్రో యాజమాన్యం, పోలీసులు భారీ జరిమానాలు విధించడంతో పాటు కఠిన చట్టపరమైన చర్యలు తీసుకోవాలని ఆగ్రహం వ్యక్తం చేస్తున్న ప్రయాణికులు డిమాండ్ చేస్తున్నారు.