మూగజీవాల పట్ల మనుషులు చూపించే ప్రేమకు హద్దులు ఉండవని నిరూపించారు మధ్యప్రదేశ్కు చెందిన ఒక రైతు. సాధారణంగా మనుషులకు మాత్రమే చేసే అంత్యక్రియలు, 13వ రోజు కర్మకాండల (తేరహ్వీ) కార్యక్రమాన్ని.. తాను 20 ఏళ్ల పాటు అల్లారుముద్దుగా పెంచుకున్న మేక కోసం జరిపించి అందరి హృదయాలను కదిలించారు.
మధ్యప్రదేశ్లోని విదిశ జిల్లా సిరోంజ్ ప్రాంతానికి చెందిన రైతు నవల్ సింగ్ మాల్వియా ఇంట్లో గత 20 ఏళ్లుగా ఒక మేకను పెంచుకుంటున్నారు. కుటుంబ సభ్యులంతా ఎంతో ప్రేమగా ‘చమేలీ’ అని పిలుచుకునే ఆ మేక, కేవలం ఒక పెంపుడు జంతువులా కాకుండా ఇంట్లో ఒక సొంత బిడ్డలా పెరిగింది.
పశువుల కొట్టంలో కాకుండా ఇంట్లోనే మంచంపై పడుకునేంతగా ఆ కుటుంబంలో ఒక భాగమైపోయింది. అయితే, ఆగస్టు 3న ఆ మేక శ్వాస తీసుకోవడంలో ఇబ్బంది తలెత్తి ప్రాణాలు విడిచింది. దీంతో ఆ రైతు కుటుంబం కన్నీరుమున్నీరైంది; ఆ రోజు వారి ఇంట్లో కనీసం పొయ్యి కూడా వెలగలేదు.
తాను ప్రాణంగా ప్రేమించిన మూగజీవానికి సకల మర్యాదలతో వీడ్కోలు పలకాలని నిర్ణయించుకున్న నవల్ సింగ్, హిందూ సాంప్రదాయం ప్రకారం అంత్యక్రియలు నిర్వహించారు. ఆ తర్వాత అస్థికలను పవిత్ర గంగానదిలో శాస్త్రోక్తంగా నిమజ్జనం చేశారు. అంతటితో ఆగకుండా, 13వ రోజు కర్మకాండల కోసం ప్రత్యేకంగా శుభలేఖ తరహాలో ఆహ్వాన పత్రికలు ముద్రించి బంధువులు, గ్రామస్థులకు పంచారు.
13 రోజుల సంతాపం ముగిసిన అనంతరం, మేక ఆత్మకు శాంతి చేకూరాలని ఆగస్టు 15న భారీ అన్నసంతర్పణ (భోజనాలు) ఏర్పాటు చేశారు. ఈ కార్యక్రమానికి బంధువులు, మిత్రులు, గ్రామస్థులు కలిపి దాదాపు 600 మంది హాజరయ్యారు. ఒక మూగజీవి పట్ల ఆ రైతు చూపించిన అపారమైన ప్రేమను, నిబద్ధతను చూసి అక్కడికి వచ్చిన ప్రతి ఒక్కరూ భావోద్వేగానికి గురై నవల్ సింగ్ను మనస్ఫూర్తిగా ప్రశంసించారు.
మనిషికి మనిషిపైనే ప్రేమ తగ్గిపోతున్న ఈ రోజుల్లో, ఒక మూగజీవిపై ఈ రైతు చూపిన ఆత్మీయత మానవత్వానికి నిలువెత్తు నిదర్శనంగా నిలిచింది.