భారతదేశంలో 20 ఏళ్ల వయసులో ఉన్న యువత తమ భవిష్యత్తును నిర్మించుకునేందుకు స్కూల్, కాలేజ్, పోటీ పరీక్షలు, ఉద్యోగాల వేట అంటూ నిరంతరం పరుగులు తీస్తూ.. తమ యవ్వనాన్ని కోల్పోతున్నారని ఓ యువతి అభిప్రాయపడింది.
అదే సమయంలో.. విదేశాలకు చెందిన యువత ఎలాంటి ఆందోళనలు లేకుండా ప్రపంచాన్ని చుట్టేస్తున్న దృశ్యాలను చూసిన ఢిల్లీకి చెందిన 23 ఏళ్ల యువతి.. తన ఆలోచనలను సోషల్ మీడియాలో పంచుకోవడంతో అది పెద్ద చర్చకు దారితీసింది.
ఢిల్లీకి పర్యటనకు వచ్చిన కొందరు యూరోపియన్ యువతను కలిసిన ఆమె.. వారి జీవన విధానాన్ని, భారత యువత ఎదుర్కొంటున్న ఒత్తిడితో కూడిన జీవితాన్ని పోల్చుతూ.. తనకు ఆశ్చర్యంతో పాటు అసంతృప్తి కలిగిందని పేర్కొంది.
ఢిల్లీలో కలిసిన ఆ విదేశీ యువత తమ 20వ దశకం ప్రారంభంలోనే ఉన్నప్పటికీ.. వెంటనే ఉద్యోగం లేదా కెరీర్ పోటీలోకి వెళ్లకుండా, ఏడాది పాటు విరామం తీసుకుని ప్రపంచ దేశాలను చుట్టి రావడానికి బయలుదేరారని ఆమె తెలిపింది.
అంతేకాదు.. “వాళ్లు ఏమీ పెద్ద కోటీశ్వరులు కాదు. తక్కువ ఖర్చుతో ప్రయాణించగల ఆసియా, దక్షిణ అమెరికా దేశాలకు వెళ్తున్నారు. కానీ మన దేశంలోని యువత మాత్రం NEET, JEE, UPSC, MBA వంటి పోటీ పరీక్షలు, ఉద్యోగాల కోసం పరిగెత్తుతూ జీవితాన్నే కోల్పోతున్నాం” అంటూ ఆమె ఆవేదన వ్యక్తం చేసింది.
ఒక సంవత్సరం చదువును లేదా ఉద్యోగాన్ని వాయిదా వేస్తే జీవితంలో వెనుకబడిపోతామనే సామాజిక ఒత్తిడి, కుటుంబ పరిస్థితులు భారత యువతను ప్రశాంతంగా జీవించకుండా చేస్తున్నాయని ఆమె అభిప్రాయపడింది.
ఈ సోషల్ మీడియా పోస్ట్ ప్రస్తుతం భారత యువతతో పాటు తల్లిదండ్రుల మధ్య కూడా పెద్ద చర్చకు దారితీసింది.
“భారతదేశంలో బలమైన సామాజిక భద్రతా వ్యవస్థ లేకపోవడం, రూపాయి విలువ వంటి ఆర్థిక అంశాలు కూడా మన జీవన విధానంపై ప్రభావం చూపుతున్నాయి” అంటూ కొందరు నెటిజన్లు తమ అభిప్రాయాలను వ్యక్తం చేస్తున్నారు.
దీంతో “జీవితంలో ఎక్కువ భాగాన్ని పరుగులోనే గడిపేస్తూ.. జీవితంలోని అసలైన ఆనందాలను, అనుభవాలను ఆస్వాదించలేకపోతున్నామా?” అనే ప్రశ్న మరోసారి సోషల్ మీడియాలో చర్చనీయాంశంగా మారింది.
ఢిల్లీ యువతి చేసిన ఈ పోస్ట్ ప్రస్తుతం సోషల్ మీడియాలో వైరల్ అవుతూ.. భారత యువత జీవనశైలి, కెరీర్ ఒత్తిడి, కుటుంబ అంచనాలపై విస్తృత చర్చకు దారితీస్తోంది.
Leave a Reply