హర్యానా రాష్ట్రం ఫరీదాబాద్‌లో, 32 ఏళ్ల కవిత అనే మహిళ శరీరంలో 20 ఏళ్లుగా దాగి ఉన్న తుపాకీ బుల్లెట్ తనంతట తానుగా బయటకు రావడం అందరినీ ఆశ్చర్యానికి గురిచేస్తోంది.
కవితకు 12 ఏళ్ల వయస్సు ఉన్నప్పుడు, పాఠశాలలో పరీక్ష రాస్తుండగా అకస్మాత్తుగా ఆమె వెన్ను కింద భాగంలో ఏదో పదునైన వస్తువు తగిలింది. అప్పుడు ఎవరో రాయి విసిరారని భావించిన ఆమె, గాయం తక్కువగా ఉండటంతో ఇంట్లోనే పసుపు, నూనె రాసి చికిత్స చేసుకుంది. గాయం తగ్గిపోవడంతో ఆమె ఆ విషయాన్ని మర్చిపోయింది. ఆ తర్వాత ఆమెకు వివాహం జరిగి, ప్రస్తుతం నలుగురు పిల్లలు కూడా ఉన్నారు.
అయితే, రెండు నెలల క్రితం సరిగ్గా అదే చోట పెద్ద గడ్డ (Abscess) ఏర్పడింది. ఇంటి చిట్కాలు వాడినా ఫలితం లేకపోవడంతో, అకస్మాత్తుగా ఆ గడ్డ పగిలి లోపలి నుండి ఒక లోహపు వస్తువు బయటకు వచ్చింది. దానిని పరీక్షించి చూడగా, అది 20 ఏళ్ల క్రితం ఆమె శరీరంలోకి దూసుకెళ్లిన ఎస్‌ఎల్‌ఆర్ (SLR) రకానికి చెందిన తుపాకీ బుల్లెట్ అని తెలిసి అందరూ విస్మయానికి గురయ్యారు.
వైద్య నిపుణుల వివరణ: “శరీరంలోకి దూసుకెళ్లిన బుల్లెట్ వేగం తక్కువగా ఉండటం, అలాగే శరీరంలోని కణజాలం (Tissues) ఆ బుల్లెట్ చుట్టూ ఒక రక్షణ కవచంలా ఏర్పడటం వల్ల ఇన్నేళ్లు ఆమెకు ఎలాంటి నొప్పి కలగలేదు” అని వైద్యులు వివరించారు. ఆపరేషన్ అవసరం లేకుండానే 20 ఏళ్ల క్రితం నాటి బుల్లెట్ బయటకు రావడాన్ని స్థానికులు ఒక అద్భుతంగా భావిస్తున్నారు.