వాషింగ్టన్: అమెరికా మాజీ ఎఫ్‌బీఐ డైరెక్టర్ రాబర్ట్ ముల్లర్ మరణంపై అధ్యక్షుడు డొనాల్డ్ ట్రంప్ అత్యంత కఠినమైన సోషల్ మీడియా పోస్ట్‌తో స్పందించారు. 2016 అధ్యక్ష ఎన్నికల్లో రష్యా జోక్యంపై సంచలన దర్యాప్తుకు నాయకత్వం వహించిన వ్యక్తి మరణాన్ని ట్రంప్ బహిరంగంగా వేడుక చేసుకున్నారు.

“రాబర్ట్ ముల్లర్ ఇప్పుడే చనిపోయారు” అని ట్రంప్ తన ‘ట్రూత్ సోషల్’ ఖాతాలో పేర్కొంటూ.. “మంచిదైంది, అతను చనిపోయినందుకు నాకు సంతోషంగా ఉంది. ఇకపై అతను అమాయక ప్రజలను వేధించలేడు!” అని రాసుకొచ్చారు.

రాబర్ట్ ముల్లర్ వయస్సు 81 ఏళ్లు. ఆయన మరణానికి ఖచ్చితమైన కారణం వెంటనే తెలియనప్పటికీ, గత కొన్నేళ్లుగా ఆయన పార్కిన్సన్ వ్యాధితో బాధపడుతున్నారు. “బాబ్ (రాబర్ట్) నిన్న రాత్రి కన్నుమూశారని తెలియజేయడానికి మేము ఎంతో విచారిస్తున్నాము. మా కుటుంబ గోప్యతను గౌరవించాలని కోరుతున్నాము” అని ఆయన కుటుంబ సభ్యులు ఒక ప్రకటన విడుదల చేశారు.

దర్యాప్తు నేపథ్యం: 2016 ఎన్నికల్లో ట్రంప్ ప్రచారానికి ప్రయోజనం చేకూర్చేలా రష్యా జోక్యం చేసుకుందని ముల్లర్ నేతృత్వంలోని రెండేళ్ల సుదీర్ఘ దర్యాప్తు 2019లో తేల్చింది. అంతకుముందు ఎఫ్‌బీఐ డైరెక్టర్ జేమ్స్ కోమీని ట్రంప్ తొలగించడంతో, 2017లో న్యాయశాఖ ముల్లర్‌ను స్పెషల్ కౌన్సిల్‌గా నియమించింది. ఈ దర్యాప్తును ట్రంప్ వందల సార్లు ‘విచ్ హంట్’ (కుట్రపూరిత వేట), ‘స్కామ్’ మరియు ‘హోక్స్’ (కల్పితం) అని కొట్టిపారేశారు.

ముల్లర్ తన నివేదికలో ట్రంప్ ప్రచార బృందానికి, రష్యాకు మధ్య సంబంధాలు ఉన్నాయని గుర్తించినప్పటికీ, నేరపూరిత కుట్ర జరిగిందని ఆరోపించలేదు. ట్రంప్ ఎలాంటి నేరం చేశారని ఆయన నిర్ధారించలేదు, అలాగని ‘అబ్స్ట్రక్షన్ ఆఫ్ జస్టిస్’ (న్యాయ విచారణకు అడ్డంకి) విషయంలో అధ్యక్షుడికి క్లీన్ చిట్ కూడా ఇవ్వలేదు. ముల్లర్‌పై ట్రంప్ పెంచుకున్న ఆ ద్వేషం ఆయన రెండోసారి అధ్యక్షుడైన తర్వాత కూడా కొనసాగుతోంది.