ఒలింపిక్ ట్రాక్పై మెరుపు వేగంతో పరిగెత్తి ప్రపంచ రికార్డులను తిరగరాసిన జమైకా స్ప్రింట్ దిగ్గజం ఉసేన్ బోల్ట్, తన వ్యక్తిగత జీవితంలో మరో కీలక అడుగు వేశారు.
అథ్లెటిక్స్ నుంచి రిటైర్ అయినప్పటికీ ప్రపంచవ్యాప్తంగా కోట్లాది మంది అభిమానులను సంపాదించుకున్న బోల్ట్.. తన చిరకాల ప్రేయసి కాసీ బెన్నెట్ (Kasi Bennett)ను వివాహం చేసుకోబోతున్నట్లు ప్రకటించారు. ఈ వార్త ప్రపంచవ్యాప్తంగా ఉన్న క్రీడాభిమానుల్లో ఎనలేని ఆనందాన్ని నింపింది.
2013 నుంచి ఉసేన్ బోల్ట్, కాసీ బెన్నెట్ ప్రేమలో మునిగితేలుతున్నారు. వివాహానికి ముందే కలిసి జీవించిన (లివ్-ఇన్ రిలేషన్ షిప్) ఈ జంటకు ఇప్పటికే ముగ్గురు పిల్లలు ఉన్నారు. ఇన్నేళ్ల పాటు తమ ప్రేమ బంధాన్ని, కుటుంబాన్ని విజయవంతంగా ముందుకు తీసుకెళ్లిన ఈ జంట.. ఇప్పుడు అధికారికంగా పెళ్లి పీటలెక్కాలని నిర్ణయించుకోవడం విశేషం.
ఉసేన్ బోల్ట్ 40వ పుట్టినరోజు వేడుకలను పురస్కరించుకుని వీరిద్దరి నిశ్చితార్థం అత్యంత ఘనంగా జరిగింది. తన జీవితంలో ఎంతో ప్రత్యేకమైన ఆ రోజున, చిరకాల ప్రేయసి కాసీ బెన్నెట్కు ఉంగరం తొడిగి తన పెళ్లి ప్రతిపాదనను బోల్ట్ అధికారికంగా ఖరారు చేశారు. ఈ ఎంగేజ్మెంట్కు సంబంధించిన ఫొటోలు, విశేషాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.
ఒలింపిక్స్లో 8 బంగారు పతకాలు సాధించి ప్రపంచ అథ్లెటిక్స్ చరిత్రలోనే సరికొత్త అధ్యాయం లిఖించిన ఉసేన్ బోల్ట్కు, ఆయన కొత్త వైవాహిక జీవితం కోసం ప్రపంచవ్యాప్తంగా ఉన్న అభిమానులు, క్రీడా ప్రముఖులు హృదయపూర్వక శుభాకాంక్షలు తెలుపుతున్నారు. రన్నింగ్ ట్రాక్పై రికార్డుల వేట సాగించిన ఈ పరుగుల వీరుడు, ఇప్పుడు తన మనసు గెలిచిన భాగస్వామితో కలిసి సరికొత్త జీవన ప్రయాణాన్ని ప్రారంభించనున్నారు.
Leave a Reply