ప్రపంచకప్ 2026 ఫుట్బాల్ టోర్నమెంట్లో ఇంగ్లాండ్ – ఘనా (Ghana) జట్ల మధ్య జరగబోయే మెగా మ్యాచ్కు ముందే ఒక విచిత్రమైన వివాదం రాజుకుంది. ఇంగ్లాండ్ జట్టు కెప్టెన్ హ్యారీ కేన్ (Harry Kane) లక్ష్యంగా ఘనా దేశానికి చెందిన ఒక మాంత్రికుడు చేతబడి (బில்லி శూన్యం) చేస్తానంటూ వింత హెచ్చరికలు జారీ చేయడం అంతర్జాతీయ ఫుట్బాల్ అభిమానుల్లో తీవ్ర చర్చనీయాంశంగా మారింది.
ఘనా దేశానికి చెందిన ప్రముఖ ఆధ్యాత్మికవేత్త, మాంత్రికుడైన ‘నానా క్వాకు బోన్సమ్’ (Nana Kwaku Bonsam).. ఈ ప్రపంచకప్ మ్యాచ్లో ఇంగ్లాండ్ కెప్టెన్ హ్యారీ కేన్ రాణించకుండా అడ్డుకోవడానికి తాను తన మంత్రశక్తులను ఉపయోగిస్తున్నట్లు సంచలన ప్రకటన చేశాడు.
రొనాల్డోను కూడా ఇలాగే చేశానంటూ సవాల్:
తాను హ్యారీ కేన్కు ఎటువంటి పెద్ద శారీరక గాయం (ఇంజ్యురీ) చేయబోవడం లేదని.. కానీ అతను మైదానంలో గోల్స్ కొట్టకుండా, ఇంగ్లాండ్ను గెలిపించకుండా అడ్డుకుని, మ్యాచ్ ఫలితాన్ని ఘనా జట్టుకు అనుకూలంగా మార్చేస్తానని సవాల్ విసిరాడు. గతంలో 2014 ప్రపంచకప్ టోర్నీలో పోర్చుగల్ జట్టుతో మ్యాచ్కు ముందు.. స్టార్ ప్లేయర్ క్రిస్టియానో రొనాల్డోకు మోకాలి గాయం అవ్వడానికి కూడా తానే కారణమంటూ అప్పట్లో ఇదే బోన్సమ్ ప్రపంచవ్యాప్తంగా సంచలనం సృష్టించడం గమనార్హం.
ఈ టోర్నీలో క్రొయేషియాతో జరిగిన గత మ్యాచ్లో అద్భుతంగా 2 గోల్స్ కొట్టి ఫుల్ ఫామ్లో ఉన్న హ్యారీ కేన్.. ఈ మ్యాచ్లో మరో ఒక్క గోల్ కొడితే చాలు, ప్రపంచకప్ చరిత్రలో ఇంగ్లాండ్ తరఫున అత్యధిక గోల్స్ చేసిన ‘గ్యారీ లినేకర్’ రికార్డును బద్దలు కొట్టి సరికొత్త చరిత్ర సృష్టిస్తాడు. అందుకే ఈ మ్యాచ్పై అభిమానుల్లో భారీ అంచనాలు ఉన్నాయి.
ఇంగ్లాండ్ వ్యూహాలు:
మైదానం వెలుపల ఈ మంత్రగాడి విచిత్ర మాటలు ఎలా ఉన్నప్పటికీ.. ఇంగ్లాండ్ జట్టు ప్రధాన కోచ్ ‘థామస్ తుహెల్’ (Thomas Tuchel) మాత్రం తమ ప్రపంచకప్ కలని నిజం చేసుకోవడంపైనే పూర్తి దృష్టి పెట్టారని ఆ జట్టు డిఫెండర్ ‘జెడ్ స్పెన్స్’ తెలిపాడు. మంత్రాల వంటి విషయాలను పట్టించుకోకుండా ఆటగాళ్లకు కఠినమైన శిక్షణ ఇస్తూ మ్యాచ్కు సిద్ధం చేస్తున్నట్లు పేర్కొన్నాడు.
మైదానం వెలుపల జరుగుతున్న ఈ చేతబడి గురించిన చర్చలు ప్రస్తుతం సోషల్ మీడియాలో స్పోర్ట్స్ లవర్స్ మధ్య విపరీతంగా ట్రెండు అవుతూ తెగ వైరల్ అవుతున్నాయి.