టెహ్రాన్: ఇరాన్ – అమెరికా మధ్య యుద్ధం కొనసాగుతోంది. యుద్ధాన్ని ఆపేందుకు అమెరికా ప్రతిపాదించిన 15 అంశాల ప్రణాళికను ఇరాన్ తిరస్కరించింది.
ఒకవైపు ఇరాన్ తన దాడులను ఉధృతం చేస్తుండగా, మరోవైపు ఇరాన్ తమతో రహస్యంగా చర్చలు జరుపుతోందని ట్రంప్ నిరంతరం చెబుతున్నారు. ఈ క్రమంలో, ఇరాన్ మంచి ఉద్దేశంతో (Goodwill) 10 ఓడల నిండా చమురును తమకు బహుమతిగా ఇచ్చిందని ట్రంప్ చెప్పడం అందరినీ విస్మయానికి గురిచేస్తోంది.
చమురు ఇస్తామని చెప్పారు
యుద్ధం ఆపే విషయంలో అమెరికాతో ఇరాన్ పరోక్ష చర్చలు జరుపుతోందని ట్రంప్ పేర్కొంటూ, ఉద్రిక్తతల మధ్యే ఇరాన్ 10 ఓడల్లో చమురును పంపిందని తెలిపారు. వైట్ హౌస్‌లో జరిగిన క్యాబినెట్ సమావేశం అనంతరం ట్రంప్ విలేకరులతో మాట్లాడుతూ ఇలా అన్నారు:
“అమెరికా మరియు ఇరాన్ మధ్య బయటకు తెలియని సంబంధాలు నడుస్తున్నాయని ఈ విషయం నిరూపిస్తోంది. మేము నిజాయితీగా ఉన్నామని చాటిచెప్పేందుకు 10 పెద్ద ఓడల నిండా చమురును మీకు ఇస్తున్నామని వారు చెప్పారు.”
10 పెద్ద ట్యాంకర్లు
“మొదటి విడత ట్యాంకర్లు కొన్ని రోజుల క్రితమే ఆ కీలకమైన (హోర్ముజ్) జలసంధి గుండా ప్రయాణించడం ప్రారంభించాయి. నేను వార్తల్లో చూశాను, అక్కడ ఏదో అసాధారణం జరుగుతోందని వారు చెప్పారు. హోర్ముజ్ జలసంధి మధ్యలో 10 ఓడలు నేరుగా వెళ్తున్నాయి. చమురుతో నిండిన 10 పెద్ద ట్యాంకర్లు అలా వెళ్తుంటే.. వారు చెప్పింది నిజమేనని నేను అనుకున్నాను.”
ఆ ఓడలపై పాకిస్థాన్ జెండా ఉన్నట్లు అనిపించిందని, సరైన వ్యక్తులతోనే చర్చలు జరుపుతున్నామనడానికి ఇది నిదర్శనమని ట్రంప్ వ్యాఖ్యానించారు. ఈ చమురు సరఫరా వెనుక జరుగుతున్న లోతైన చర్చలతో సంబంధం ఉండవచ్చని ఆయన అభిప్రాయపడ్డారు.
ఇరాన్ సుప్రీం లీడర్‌గా ఉండమన్నారు!
అంతకుముందు ఇచ్చిన మరో ఇంటర్వ్యూలో ట్రంప్ మరిన్ని షాకింగ్ విషయాలు చెప్పారు. అయతుల్లా ఖమేనీ మరణం తర్వాత ఇరాన్ తదుపరి సుప్రీం లీడర్‌గా బాధ్యతలు చేపట్టమని ఇరాన్ తనను ఆహ్వానించిందని, కానీ తాను దానిని తిరస్కరించానని ఆయన పేర్కొన్నారు.
“అమెరికా – ఇరాన్ మధ్య చర్చలు జరుగుతున్నాయి. ఒప్పందం కుదుర్చుకోవాలని ఇరాన్ కోరుకుంటోంది, కానీ అది బయటకు చెప్పడానికి వారు భయపడుతున్నారు. తమ సొంత ప్రజలే తమను చంపేస్తారేమోనని లేదా మా చేతిలో హతమవుతామేమోనని వారు ఆందోళన చెందుతున్నారు. అందుకే ఇరాన్ రహస్యంగా చర్చలు జరపాలని కోరుకుంటోంది. ఖమేనీ తర్వాత నన్ను సుప్రీం లీడర్‌గా ఉండమనే ప్రతిపాదనను ఇరాన్ నాయకత్వం నా ముందు ఉంచింది, కానీ నేను వద్దు అని చెప్పేశాను” అని ట్రంప్ వివరించారు.