ప్రపంచవ్యాప్తంగా అత్యధికంగా అమ్ముడైన ఆర్థిక పుస్తకం ‘రిచ్ డాడ్ పూర్ డాడ్’ రచయిత రాబర్ట్ కియోసాకి, 2026 సంవత్సరం సంపదను సృష్టించడానికి ఒక సువర్ణావకాశమని పేర్కొన్నారు. అయితే, సరైన నిర్ణయం తీసుకోకపోతే అంతే వేగంగా పేదరికంలోకి జారిపోయే ప్రమాదం ఉందని ఆయన హెచ్చరించారు.
2026 ఒక గొప్ప అవకాశం
రాబర్ట్ కియోసాకి సోషల్ మీడియాలో పోస్ట్ చేస్తూ, 2026 ఆర్థిక సంక్షోభంలా అనిపించినా, అది జీవితకాలంలో ఒక్కసారి మాత్రమే వచ్చే అద్భుతమైన ఆర్థిక అవకాశం (Financial Opportunity) అని తెలిపారు. చాలామంది ‘మార్పు’ అంటే భయపడతారని, కానీ దానిని తాను ఒక అవకాశంగా చూస్తున్నానని ఆయన అన్నారు.
విజేతలు ఎవరు? పరాజితులు ఎవరు?
రాబర్ట్ కియోసాకి విశ్లేషణ ప్రకారం 2026లో ఫలితాలు ఇలా ఉండవచ్చు:
- విజేతలు: బంగారం (Gold), వెండి (Silver), బిట్‌కాయిన్ (Bitcoin), రియల్ ఎస్టేట్ మరియు ఆదాయాన్ని ఇచ్చే వ్యాపారాలలో పెట్టుబడి పెట్టే వారు ఈ ఏడాది విజేతలుగా నిలుస్తారు.
- పరాజితులు: కేవలం నగదును దాచుకునేవారు (Cash savers), కేవలం నెల జీతంపైనే ఆధారపడేవారు, ధరలు తగ్గుతాయని ఎదురుచూసేవారు మరియు పెన్షన్ పథకాలపైనే పూర్తిగా ఆధారపడేవారు భవిష్యత్తులో పేదలుగా మిగిలిపోయే ప్రమాదం ఉందని ఆయన హెచ్చరించారు.
డబ్బు ఎక్కడి నుండి ఎక్కడికి వెళ్తుంది?
డబ్బు అనేది ఒకరి నుండి మరొకరికి మారుతుందని కియోసాకి వివరించారు:
- డబ్బును సేవ్ చేసే వారి నుండి పెట్టుబడి పెట్టే వారికి సంపద మారుతుంది.
- ఉద్యోగుల నుండి యజమానులకు చేరుతుంది.
- వ్యవస్థను గుడ్డిగా నమ్మే వారి నుండి, ఆ వ్యవస్థ ఎలా పనిచేస్తుందో అర్థం చేసుకున్న వారికి లాభం కలుగుతుంది.
ఇది జూదంతో సమానం!
విద్య లేదా అవగాహన లేకుండా ఆస్తులను కొనడం జూదంతో సమానమని ఆయన హెచ్చరించారు. డబ్బు ఎలా కదులుతోంది? అప్పును (Debt) మనకు అనుకూలంగా ఎలా వాడుకోవాలి? పన్నుల (Taxes) ద్వారా యజమానులు ఎలా లాభపడతారు? మార్కెట్ పరిస్థితులతో సంబంధం లేకుండా ఆదాయాన్ని ఎలా సృష్టించాలి? అనే విషయాలను అర్థం చేసుకోవడమే నిజమైన లాభమని ఆయన పేర్కొన్నారు