కొత్త సంవత్సరం ప్రారంభం కాగానే ప్రతి ఒక్కరూ తమ జాతకాలు, భవిష్యత్తు ఎలా ఉండబోతుందో అని ఆరా తీస్తుంటారు. ఈ క్రమంలోనే 16వ శతాబ్దానికి చెందిన ప్రఖ్యాత ఫ్రెంచ్ జ్యోతిష్కుడు మైకేల్ డి నోస్ట్రడామస్ 2026 గురించి చెప్పిన అంచనాలు ఇప్పుడు సోషల్ మీడియాలో వైరల్ అవుతున్నాయి.
1555లో ఆయన రాసిన ‘లెస్ ప్రొఫెటీస్’ (Les Propheties) పుస్తకంలో 942 పద్యాల (Quatrains) రూపంలో భవిష్యత్తును సూచించారు. అందులోని 26వ పద్యం ఈ 2026వ సంవత్సరానికి సంబంధించిందని విశ్లేషకులు భావిస్తున్నారు. గతంలో హిట్లర్ ఎదుగుదల, ప్రిన్సెస్ డయానా మరణం, అమెరికాపై 9/11 దాడుల వంటివి ఆయన చెప్పినట్లే జరగడంతో ఇప్పుడు ఈ అంచనాలు ఆందోళన కలిగిస్తున్నాయి.
2026 గురించి నోస్ట్రడామస్ చెప్పిన భయంకర అంచనాలు:
- ఏడు నెలల మహాయుద్ధం: నోస్ట్రడామస్ తన భవిష్యవాణిలో ఏడు నెలల పాటు భారీ యుద్ధం జరుగుతుందని పేర్కొన్నారు. దీనిని ప్రస్తుత రష్యా-ఉక్రెయిన్ సంక్షోభం లేదా ఇతర దేశాల మధ్య పెరగబోయే ఉద్రిక్తతలకు సంకేతంగా విశ్లేషకులు భావిస్తున్నారు.
- రాత్రి వేళ ఆకస్మిక దాడులు: “తేనెటీగల భారీ సమూహం” వలె రాత్రి వేళ కుట్రపూరిత దాడులు జరుగుతాయని ఆయన సూచించారు. నేటి కాలంలో దీనిని ‘డ్రోన్ దాడులు’ లేదా వ్యవస్థీకృత సైనిక దాడులుగా నిపుణులు అభివర్ణిస్తున్నారు. అలాగే ఇది పుతిన్ లేదా ట్రంప్ వంటి శక్తివంతమైన నాయకులకు సంకేతమని కూడా కొందరు వాదిస్తున్నారు.
- ప్రముఖ ప్రపంచ నేత మరణం: 2026లో ఒక ప్రసిద్ధ వ్యక్తి లేదా ప్రపంచ నేత ఆకస్మికంగా మరణిస్తారని ఆయన రాశారు. ఈ మరణం పిడుగు పడినట్లు అకస్మాత్తుగా సంభవిస్తుందని, ఇది ప్రపంచాన్ని దిగ్భ్రాంతికి గురిచేస్తుందని పేర్కొన్నారు.
- రక్తపాతం మరియు విలయం: స్విట్జర్లాండ్‌లోని దక్షిణ ప్రాంతమైన ‘టిసినో’లో భీకర ప్రవాహం సంభవిస్తుందని ఆయన తెలిపారు. ఇది కేవలం ప్రకృతి వైపరీత్యం మాత్రమే కాకుండా యుద్ధం, వ్యాధులు లేదా రక్తపాతానికి సంకేతం కావచ్చని విశ్లేషిస్తున్నారు.
పాత ఫ్రెంచ్ మరియు లాటిన్ భాషల్లో నిగూఢంగా ఉన్న ఈ కవితాత్మక అంచనాలు ఎంతవరకు నిజమవుతాయో తెలియదు కానీ, ఇవి వింటున్న ప్రజల్లో మాత్రం ఒకింత ఆందోళన రేకెత్తిస్తున్నాయి.