భారత స్టార్ లెగ్ స్పిన్నర్ యుజ్వేంద్ర చహల్ మరియు నటి తానియా ఛటర్జీల వ్యవహారం ఇప్పుడు కేవలం సోషల్ మీడియా రచ్చకే పరిమితం కాకుండా చట్టపరమైన మలుపు తీసుకుంది. ఒకప్పుడు సరదాగా రాసుకున్న ‘క్యూట్’ మెసేజ్ కాస్తా ఇప్పుడు కోర్టు మెట్లు ఎక్కే వరకు వెళ్ళింది. తన ప్రతిష్టకు భంగం కలిగించేలా వ్యాఖ్యలు చేసినందుకు గానూ చహల్ తనపై ‘మాననష్ట దావా’ (Defamation Case) వేశారని తానియా స్వయంగా వెల్లడించడంతో ఈ వివాదం దేశవ్యాప్తంగా హాట్ టాపిక్ అయింది.
వివాదానికి బీజం పడింది ఇలా..
ఈ రచ్చ అంతా తానియా ఛటర్జీ చేసిన ఒక చిన్న ప్రకటనతో మొదలైంది. గతంలో ఒకసారి పాపరాజీలతో మాట్లాడుతూ.. యుజ్వేంద్ర చహల్ తనకు ఇన్స్టాగ్రామ్లో మెసేజ్ చేశారని, అందులో తనను ‘క్యూట్’ అని సంబోధించారని ఆమె క్లెయిమ్ చేశారు. 2023లో జరిగిన ఈ విషయాన్ని ఆమె ఇప్పుడు బయటపెట్టడంతో అది కాస్తా క్షణాల్లో వైరల్ అయి, సోషల్ మీడియాలో పెద్ద దుమారానికే దారితీసింది.
చహల్ టీం సీరియస్.. లీగల్ యాక్షన్!
తానియా వ్యాఖ్యలు వైరల్ అయిన వెంటనే చహల్ బృందం స్పందించింది. ఆమె చెప్పిన విషయాలను తీవ్రంగా పరిగణించిన చహల్, ఆమెపై మాననష్ట దావా వేసినట్లు తెలుస్తోంది.
నటి ఆవేదన: తాజా వీడియోలో తానియా మాట్లాడుతూ.. “గతంలో నేను చెప్పిన విషయాలు అంత వైరల్ అవుతాయని నేను ఊహించలేదు. ఇప్పుడు అందరూ నన్నే టార్గెట్ చేస్తున్నారు. ఆ మెసేజ్ చేసింది ఆయన, కానీ ఇక్కడ బద్నాం అవుతుంది మాత్రం నేను. సోషల్ మీడియాలో నా గురించి చాలా అసభ్యంగా మాట్లాడుతున్నారు. పైగా నాపై డిఫమేషన్ కేసు కూడా వేశారు” అంటూ వాపోయింది.
వీడియో తొలగించాలని ఒత్తిడి?
ఈ వివాదం ముదురుతున్న సమయంలోనే చహల్ టీం నుండి తనకు మెసేజ్లు వచ్చాయని తానియా ఆరోపించారు. వైరల్ అయిన వీడియోలను సోషల్ మీడియా నుండి వెంటనే తొలగించాలని వారు కోరారని ఆమె పేర్కొన్నారు. అయితే అప్పటికే పరిస్థితి చేయిదాటిపోవడంతో, చహల్ లీగల్ రూట్ను ఎంచుకున్నట్లు స్పష్టమవుతోంది.
నెటిజన్ల రియాక్షన్..
ఈ ఇష్యూపై సోషల్ మీడియా రెండు వర్గాలుగా విడిపోయింది. కొందరు చహల్ను సపోర్ట్ చేస్తూ నటి పబ్లిసిటీ కోసమే ఇలా చేస్తోందని విమర్శిస్తుండగా, మరికొందరు ఆమెకు మద్దతుగా నిలుస్తున్నారు. ఏదేమైనా ఒక పాత మెసేజ్ ఇప్పుడు ఒక క్రికెటర్ కెరీర్ మరియు ఒక నటి ఇమేజ్పై ప్రభావం చూపే స్థాయికి వెళ్ళింది.