“బీహారీలు సాధారణమైన మనుషులు కారు” అని నిరూపించేలా మరో ఆసక్తికరమైన ప్రపంచ రికార్డు సంఘటన వెలుగులోకి వచ్చింది.
బీహార్‌కు చెందిన 19 ఏళ్ల యువకుడు శుభమ్ కుమార్.. ప్రపంచ ప్రసిద్ధి చెందిన ‘క్యాండీ క్రష్’ మొబైల్ గేమ్‌లో ఏకంగా 22,222వ లెవెల్‌ను అధిగమించి అంతర్జాతీయ రికార్డుల పుస్తకంలో చోటు దక్కించుకున్నాడు.
సాధారణంగా మొబైల్ గేమ్‌లలో రెండు మూడు వందల లెవెల్స్ దాటడమే చాలామందికి పెద్ద సవాలుగా మారుతుంది. అలాంటిది, ఈ యువకుడు తన అసాధారణమైన పట్టుదలతో నిరంతరం ఆడుతూ ‘ఇంటర్నేషనల్ బుక్ ఆఫ్ రికార్డ్స్’ (International Book of Records) గుర్తింపును సాధించాడు.
“Highest Level Achieved in Candy Crush Saga Teenager” — అంటే క్యాండీ క్రష్ సాగా గేమ్‌లో టీనేజ్ విభాగంలో అత్యధిక లెవెల్ సాధించిన వ్యక్తిగా అతడు ఈ ప్రపంచ రికార్డును తన పేరుపై లిఖించుకున్నాడు.
రేయింబవళ్లు పట్టువదలకుండా ఆడి 22,222వ మైలురాయిని చేరుకున్న ఈ యువకుడి వీడియోలు, ఫోటోలు ప్రస్తుతం ఇంటర్నెట్‌లో విపరీతంగా వైరల్ అవుతున్నాయి. వీటిని చూసిన నెటిజన్లు “నిజంగానే బీహార్ బిగినర్స్‌ కోసం కాదు భయ్యా!” (Bihar is not for beginners) అంటూ ఆశ్చర్యంతో కామెంట్లు పెడుతున్నారు.
ఒక సాధారణ మొబైల్ గేమ్‌ను సైతం వరల్డ్ రికార్డ్‌గా మార్చేసిన ఈ యువకుడిపై సోషల్ మీడియాలో ప్రశంసల జల్లు కురుస్తోంది. అదే సమయంలో, యువత తమ ఏకాగ్రతను సరైన దిశలో ఉపయోగిస్తే దేనిలోనైనా అద్భుతాలు సాధించవచ్చని పలువురు అభిప్రాయపడుతున్నారు.