23 ఏళ్ల తర్వాత ఇంటికి తిరిగి వచ్చిన కొడుకు: బిహార్లోని బక్సర్ జిల్లా, ధన్సోయ్ బజార్లోని లోహార్ టోలీలో 23 ఏళ్ల క్రితం ఇల్లు వదిలి వెళ్లిన ఒక వ్యక్తి, సోమవారం నాడు యోగి వేషంలో తిరిగి ఇంటికి చేరుకున్నాడు.
పెరిగిన జుట్టు, గడ్డం, సన్యాసి వేషధారణలో ఉండటంతో అతడిని ఎవరూ గుర్తుపట్టలేకపోయారు. కానీ, అతను తన చిన్నతనంలో నేర్చుకున్న సారంగిని వాయిస్తూ పాత పాటలు పాడటంతో, అందరూ అతడిని గుర్తుపట్టారు. కొడుకును చూడగానే తండ్రి, కుటుంబ సభ్యుల కళ్లు చెమర్చాయి. తన కుటుంబానికి, గ్రామానికి సంబంధించిన అనేక విషయాలను అతను గుర్తు చేయడంతో, వారు తమ కుమారుడు ‘లఖన్’ అని నిర్ధారించుకున్నారు.
కొడుకు తిరిగి రావడంతో కుటుంబ సభ్యులు ఆనందబాష్పాలు రాల్చారు. 2003లో 15 ఏళ్ల వయసులో తండ్రి మందలించడంతో కోపగించుకుని లఖన్ శర్మ ఇల్లు వదిలి వెళ్లిపోయాడని కుటుంబీకులు తెలిపారు. అప్పట్లో చాలా చోట్ల వెతికినా ఫలితం లేకపోయింది. చివరికి వాడు తిరిగి వస్తాడన్న ఆశను కూడా వారు వదిలేశారు.
కుటుంబ సభ్యులకు ఎలా నమ్మకం కలిగింది? సోమవారం అకస్మాత్తుగా చేతిలో సారంగి పట్టుకుని, సన్యాసి వేషంలో లఖన్ గ్రామానికి వచ్చాడు. అతను చెప్పిన విషయాలు, వాయించిన బాణీలు చూసి అది తమ కొడుకేనని వారు నమ్మారు. ఈ విషయం తెలియగానే కుటుంబ సభ్యులు, బంధుమిత్రులు అతడిని చూసేందుకు తరలివచ్చారు. సన్యాసాన్ని వదిలేసి తిరిగి ఇంట్లో ఉండాలని తల్లిదండ్రులు కోరినా, అతను నిరాకరించాడు. తాను ఇప్పటికే సన్యాస ధర్మాన్ని స్వీకరించానని, దానిని వదులుకోలేనని స్పష్టం చేశాడు.
తిరిగి రావడానికి కారణం ఏంటి? తన సన్యాస ప్రక్రియ పూర్తి కావాలంటే, తల్లిదండ్రుల చేతుల మీదుగా భిక్ష స్వీకరించాల్సి ఉంటుందని లఖన్ తెలిపాడు. దీంతో తండ్రి దీపక్ శర్మ కన్నీళ్లతో తన కొడుకుకు భిక్ష వేశారు. ప్రస్తుతం ఈ ఘటన ఆ ప్రాంతంలో చర్చనీయాంశంగా మారింది.