లక్నో: సైబర్ నేరగాళ్లు మరోసారి రెచ్చిపోయారు. ఆర్థిక శాఖ నుండి రిటైర్ అయిన 73 ఏళ్ల వృద్ధుడు అమర్‌జీత్ సింగ్‌ను ‘మనీలాండరింగ్’ కేసులో ఇరికించి, కుటుంబం మొత్తాన్ని జైలుకు పంపుతామని బెదిరించారు. డిసెంబర్ 1 నుండి 24 వరకు ఆయనను ‘డిజిటల్ అరెస్ట్’ చేసి, ఏకంగా 90 లక్షల రూపాయలను కొల్లగొట్టారు.
అసలేం జరిగింది?
లక్నోలోని ఎల్‌డిఏ కాలనీకి చెందిన అమర్‌జీత్ సింగ్‌కు డిసెంబర్ 1న ఒక వీడియో కాల్ వచ్చింది. అవతలి వ్యక్తి తనను తాను ముంబై సైబర్ క్రైమ్ సెల్ ఆఫీసర్ గిరీష్ కుమార్‌గా పరిచయం చేసుకున్నాడు. అమర్‌జీత్ పేరు మీద మనీలాండరింగ్ కేసులు ఉన్నాయని, అరెస్ట్ వారంట్ కూడా జారీ అయిందని భయపెట్టాడు. నకిలీ కోర్టు వారంట్‌ను వాట్సాప్ ద్వారా పంపి ఆయనను పూర్తిగా నమ్మించాడు.
90 లక్షల దోపిడీ:
కుటుంబం మొత్తాన్ని జైలుకు పంపుతామని బెదిరించిన నేరగాళ్లు, దర్యాప్తు పేరుతో ఆయన బ్యాంక్ వివరాలు సేకరించారు. “మీ డబ్బును తనిఖీ చేయాలి, మా అకౌంట్‌కు కోటి రూపాయలు పంపండి, తనిఖీ పూర్తయ్యాక తిరిగి ఇచ్చేస్తాం” అని నమ్మబలికారు. భయపడిపోయిన అమర్‌జీత్ తన సేవింగ్స్, మ్యూచువల్ ఫండ్స్ మరియు ఎఫ్.డి (FD)లను కూడా రద్దు చేసి మొత్తం 90 లక్షల రూపాయలను ఒడిశా, పశ్చిమ బెంగాల్, జార్ఖండ్ వంటి రాష్ట్రాల్లోని వివిధ ఖాతాలకు బదిలీ చేశారు.
కొడుకుకి వచ్చిన అనుమానం:
బెంగళూరులో ఉద్యోగం చేసే అమర్‌జీత్ కుమారుడు అమర్‌ప్రీత్ సింగ్ సెలవులకు ఇంటికి వచ్చాడు. డిసెంబర్ 25న తండ్రి మిద్దెపై ఎవరో అపరిచితులతో చాలా భయంగా ఫోన్ మాట్లాడటం గమనించి ఆరా తీశాడు. మొదట అమర్‌జీత్ దాచిపెట్టడానికి ప్రయత్నించినప్పటికీ, కొడుకు ఒత్తిడి చేయడంతో అసలు విషయం బయటపెట్టాడు. వెంటనే సైబర్ క్రైమ్ పోలీసులకు ఫిర్యాదు చేయగా, పోలీసులు ఇప్పటివరకు నేరగాళ్ల ఖాతాల్లోని 15 లక్షల రూపాయలను ఫ్రీజ్ చేయగలిగారు.
సైబర్ నేరాల నుండి రక్షణ పొందడానికి జాగ్రత్తలు:
- గుర్తించండి: పోలీస్, సీబీఐ లేదా మరే ఇతర ప్రభుత్వ సంస్థలు వీడియో కాల్ ద్వారా ఎవరినీ ‘డిజిటల్ అరెస్ట్’ చేయవు. ఇలాంటి కాల్స్ వస్తే అవి నకిలీవని గ్రహించండి.
- వ్యక్తిగత సమాచారం: అపరిచితులకు మీ బ్యాంక్ వివరాలు, పాస్‌వర్డ్‌లు లేదా ఓటిపి (OTP)లను ఎప్పుడూ చెప్పకండి.
- లింక్స్‌పై జాగ్రత్త: తెలియని నంబర్ల నుండి వచ్చే మెసేజ్‌లు లేదా లింక్స్‌ను క్లిక్ చేయకండి.
- వెరిఫై చేయండి: ప్రభుత్వ అధికారులుగా ఎవరైనా ఫోన్ చేస్తే, వెంటనే సమీపంలోని పోలీస్ స్టేషన్‌కు వెళ్లి నిర్ధారించుకోండి.
- వెంటనే ఫిర్యాదు చేయండి: మీరు సైబర్ మోసానికి గురైతే వెంటనే 1930 కి కాల్ చేయండి లేదా www.cybercrime.gov.in లో ఫిర్యాదు చేయండి.