లక్నో: సైబర్ నేరగాళ్లు మరోసారి రెచ్చిపోయారు. ఆర్థిక శాఖ నుండి పదవీ విరమణ పొందిన 73 ఏళ్ల వృద్ధుడు అమర్జీత్ సింగ్‌ను ‘మనీ లాండరింగ్’ కేసులో ఇరికించి, కుటుంబం మొత్తాన్ని జైలుకు పంపుతామని భయపెట్టారు. ఏకంగా 24 రోజుల పాటు (డిసెంబర్ 1 నుండి 24 వరకు) ఆయనను ‘డిజిటల్ అరెస్ట్’ చేసి, ఏకంగా 90 లక్షల రూపాయలను ఒడిశా, పశ్చిమ బెంగాల్, జార్ఖండ్ వంటి రాష్ట్రాల బ్యాంకు ఖాతాలకు బదిలీ చేయించుకున్నారు.
తండ్రి కంగారు పడటం చూసి అనుమానం వచ్చిన కొడుకు నిలదీయడంతో అసలు విషయం వెలుగులోకి వచ్చింది. సైబర్ క్రైమ్ పోలీస్ స్టేషన్‌లో కేసు నమోదు చేయగా, ఇన్‌స్పెక్టర్ బృజేష్ కుమార్ యాదవ్ తెలిపిన వివరాల ప్రకారం.. నిందితుల ఖాతాల్లో ఉన్న 15 లక్షల రూపాయలను పోలీసులు ఫ్రీజ్ చేయగలిగారు.
ముంబై పోలీస్ ఆఫీసర్ పేరుతో బెదిరింపులు
కాన్పూర్ రోడ్డులోని ఎల్డీఏ కాలనీలో నివసించే అమర్జీత్ సింగ్ కుమారుడు అమర్‌ప్రీత్ సింగ్ బెంగళూరులో ఉద్యోగం చేస్తున్నాడు. డిసెంబర్ 1న అమర్జీత్ సింగ్‌కు ఒక వీడియో కాల్ వచ్చింది. అవతలి వ్యక్తి తాను ముంబై సైబర్ క్రైమ్ సెల్ ఆఫీసర్ గిరీష్ కుమార్‌నని పరిచయం చేసుకున్నాడు. అమర్జీత్ సింగ్‌పై మనీ లాండరింగ్ కేసు నమోదైందని, అరెస్ట్ వారెంట్ కూడా జారీ అయిందని భయపెట్టాడు. నమ్మించడానికి వాట్సాప్‌లో ఒక నకిలీ కోర్టు వారెంట్‌ను కూడా పంపాడు.
అరెస్ట్ భయంతో ఎఫ్డీలు (FD) కూడా రద్దు
ఆ వారెంట్ చూసి అమర్జీత్ సింగ్ భయపడ్డారు. మీ డబ్బును తనిఖీ చేయాలని, దర్యాప్తు పూర్తయ్యాక తిరిగి ఇచ్చేస్తామని నమ్మించి కోటి రూపాయలు డిమాండ్ చేశారు. భయంతో అమర్జీత్ సింగ్ తన బ్యాంకు ఖాతాల్లో ఉన్న సొమ్ముతో పాటు, మ్యూచువల్ ఫండ్స్ మరియు ఫిక్స్‌డ్ డిపాజిట్లను (FD) కూడా రద్దు చేసి సుమారు 90 లక్షల రూపాయలను సైబర్ నేరగాళ్లు చెప్పిన ఖాతాలకు పంపారు.
కొడుకుకు అనుమానం ఎలా వచ్చింది?
డిసెంబర్ 25న అమర్జీత్ సింగ్ ఇంటి మేడపై ఎవరితోనో ఫోన్లో చాలా ఆందోళనగా మాట్లాడటం కొడుకు గమనించాడు. అడిగితే తండ్రి పొంతన లేని సమాధానాలు చెప్పారు. ఆ సాయంత్రం ఒక బంధువు ఇంటికి వెళ్లి వస్తున్నప్పుడు కూడా ఆయన తీవ్ర భయాందోళనలో ఉండటం చూసి, కొడుకు గట్టిగా నిలదీయడంతో జరిగిందంతా వివరించారు.
మీరు ఇలాంటి మోసాల బారిన పడకూడదంటే ఇవి పాటించండి:
- గుర్తు తెలియని కాల్స్: గుర్తు తెలియని నంబర్ల నుండి వచ్చే ఫోన్ కాల్స్ లేదా మెసేజ్‌లకు వెంటనే స్పందించకండి.
- గుర్తింపును తనిఖీ చేయండి: ఎవరైనా ప్రభుత్వ అధికారి అని చెప్పుకుంటే, ముందుగా వారి గుర్తింపును ధృవీకరించుకోండి.
- వ్యక్తిగత సమాచారం: బ్యాంక్ వివరాలు, పాస్‌వర్డ్‌లు లేదా ఓటీపీలను ఎవరితోనూ పంచుకోవద్దు. గుర్తుంచుకోండి, ఏ ప్రభుత్వ సంస్థ లేదా పోలీస్ శాఖ వీడియో కాల్ ద్వారా మిమ్మల్ని అరెస్ట్ చేయదు.
- లింక్‌లపై క్లిక్ చేయవద్దు: తెలియని మెసేజ్‌లలో వచ్చే లింక్‌లను క్లిక్ చేయకండి.
- వెంటనే రిపోర్ట్ చేయండి: మీరు ‘డిజిటల్ అరెస్ట్’కు గురవుతున్నారని అనుమానం వస్తే, ఏమాత్రం భయపడకుండా వెంటనే 1930 నంబర్‌కు కాల్ చేయండి లేదా సమీపంలోని సైబర్ క్రైమ్ పోలీసులకు ఫిర్యాదు చేయండి.