అపోలో ఆసుపత్రిలో పనిచేసే ప్రముఖ న్యూరోలాజిస్ట్ డాక్టర్ సుధీర్ కుమార్, తన క్లినిక్‌కు వచ్చిన ఒక 25 ఏళ్ల యువతి కేసు గురించి ‘X’ (గతంలో ట్విట్టర్)లో పోస్ట్ చేశారు. ఆమె వారం రోజులుగా తల ఎడమ వైపు తీవ్రమైన నొప్పితో బాధపడుతోంది. “ఆఫీస్ పని ఒత్తిడి, నిద్రలేమి వల్లే ఈ నొప్పి వస్తోందని ఆమె భావించింది” అని డాక్టర్ పేర్కొన్నారు. యువతలో చాలా మందిలాగే ఆమె కూడా ఇది తగ్గిపోతుందని అనుకుంది.
నిజానికి ఆమె ఒక హెడ్ మసాజ్ (తల మర్దన) చేయించుకుందామని బయలుదేరింది. కానీ దారిలో ఒక్కసారి డాక్టరును సంప్రదిద్దామన్న ఆలోచన ఆమె ప్రాణాలను కాపాడింది.
ఇది సాధారణ తలనొప్పి కాదు
ఆమె తన బాధను వివరిస్తుండగా, డాక్టరుకు ఏదో తేడాగా అనిపించింది. అది సాధారణ టెన్షన్ తలనొప్పి కాదని ఆయన గ్రహించారు. ఆ నొప్పి ఎంత తీవ్రంగా ఉందంటే, ఆమెను నిద్రలో నుండి మేల్కొలిపేంతగా ఉంది. ఉదయం లేవగానే కూడా తలనొప్పి వస్తోంది. డాక్టర్ వెంటనే బ్రెయిన్ స్కాన్ (Brain Scan) చేయించుకోమని సలహా ఇచ్చారు. మొదట ఆమె సంకోచించినా, చివరకు ఒప్పుకుంది.
స్కాన్ రిపోర్టు చూసి డాక్టర్ కూడా షాక్ అయ్యారు. అది బ్రెయిన్ ట్యూమర్ (మెదడు గడ్డ). ఆ విషయం తెలియగానే ఆమె ప్రపంచం ఒక్కసారిగా కుప్పకూలిపోయింది. అప్పటికే ఆమెకు నిశ్చితార్థం జరిగింది, రెండు నెలల్లో పెళ్లి ఉంది. “నా కాబోయే భర్తకు ఏం చెప్పాలి? పెళ్లి ఆగిపోతుందా? నా జీవితం మళ్ళీ సాధారణంగా మారుతుందా?” అని ఆమె ఎన్నో ప్రశ్నలతో సతమతమైంది.
శస్త్రచికిత్స మరియు ఊరట
ఆమె తల్లిదండ్రులతో వచ్చిన తర్వాత, డాక్టర్లు పరిస్థితిని వివరించి తర్వాతి రోజే సర్జరీకి ఏర్పాట్లు చేశారు. ఆపరేషన్ విజయవంతమైంది. ఆ తర్వాత బయాప్సీ (Biopsy) రిపోర్ట్ కోసం ఎదురుచూడటం అందరికీ ఒక పరీక్షలా మారింది. చివరకు రిపోర్టులో అది ‘మెనింజియోమా’ (Meningioma) అని తేలింది. ఇది ప్రమాదకరం కాని గడ్డ (Benign Tumour), దీనిని పూర్తిగా నయం చేయవచ్చు.
ఏడాది తర్వాత ఆమె తన భర్తతో కలిసి డాక్టరును కలవడానికి వచ్చింది. అప్పటికే ఆమెకు పెళ్ళై మూడు నెలలు అయింది. డాక్టర్ తన పోస్ట్‌ను ముగిస్తూ ఇలా అన్నారు: “ప్రతి తలనొప్పి సాదాసీదాది కాదు. వయసు చిన్నదని మీకు జబ్బులు రావని అనుకోవద్దు.”
మీరు ఎప్పుడూ నిర్లక్ష్యం చేయకూడని హెచ్చరిక సంకేతాలు:
చాలా తలనొప్పులు ఒత్తిడి లేదా నిద్రలేమి వల్ల వస్తాయి. కానీ ఈ క్రింది లక్షణాలు ఉంటే మాత్రం వెంటనే డాక్టరును సంప్రదించాలి:
- నిద్రకు ఆటంకం కలిగించే తలనొప్పి: నిద్రలో నుంచి మిమ్మల్ని మేల్కొలిపేంత తీవ్రమైన నొప్పి సాధారణమైనది కాదు.
- ఉదయాన్నే వచ్చే నొప్పి: ప్రతిరోజూ ఉదయం లేవగానే తలనొప్పిగా ఉండి, పగలు గడిచేకొద్దీ తగ్గుతుంటే, అది మెదడులో ఒత్తిడి పెరిగిందని అర్థం కావచ్చు.
- మునుపెన్నడూ లేని విధంగా నొప్పి: నొప్పి తీవ్రత, అది వచ్చే ప్రదేశం మునుపటి కంటే భిన్నంగా ఉంటే అశ్రద్ధ చేయకండి.
- క్రమంగా పెరుగుతున్న నొప్పి: రోజురోజుకూ నొప్పి పెరుగుతున్నా లేదా తరచుగా వస్తున్నా అది ప్రమాదకర సంకేతం (Red Flag).
- వాంతులు మరియు వికారం: తలనొప్పితో పాటు ఉదయాన్నే వికారం లేదా వాంతులు అవ్వడం నరాల సంబంధిత సమస్యకు సంకేతం కావచ్చు.
- చూపు మసకబారడం: కళ్లు మసకబారడం, వస్తువులు రెండుగా కనిపించడం (Double vision) వంటివి జరిగితే తక్షణమే పరీక్ష చేయించుకోవాలి.