లక్నో: అదనపు కట్నం కోసం మరో ఆడబిడ్డ బలైంది. వరకట్న దురాశాపరుల వేధింపులకు 26 ఏళ్ల శ్వేత ప్రాణాలు కోల్పోయింది. ఆమె చేతి మెహందీలో రాసుకున్న ‘సదా సౌభాగ్యవతి భవ’ అనే ఆశయం, ఆరు నెలల వైవాహిక జీవితం తర్వాత విషాదాంతమైంది. సోమవారం (మే 25) లక్నోలోని అత్తగారింట్లో శ్వేత ఉరి వేసుకుని కనిపించింది.
కుటుంబ సభ్యుల ఆరోపణ: ఇది ఆత్మహత్య కాదు, “ముందుగా ప్లాన్ చేసిన హత్య” అని శ్వేత కుటుంబ సభ్యులు ఆరోపిస్తున్నారు. శ్వేత తండ్రి ఉమేశ్ కుమార్ సింగ్ ప్రకారం, తన ఆర్థిక స్థోమతకు మించి పెళ్లికి ఖర్చు చేసినప్పటికీ, వరకట్నంగా ‘స్కార్పియో కారు’ కోసం తన కుమార్తెను వేధించి చంపేశారని ఆయన కన్నీరుమున్నీరయ్యారు.
నవంబర్ 22, 2025న వివాహం: శ్వేతకు, భూపేంద్ర సింగ్తో 2025 నవంబర్ 22న వివాహం జరిగింది. పెళ్లి రోజు నుండే వేధింపులు మొదలయ్యాయని శ్వేత సోదరీమణులు కోమల, జ్యోతి పేర్కొన్నారు. పెళ్లి ఊరేగింపు సమయంలో వరుడు, అతని తండ్రి రూ. 10 లక్షలు, స్కార్పియో కారు డిమాండ్ చేశారని, అప్పుడు తన తండ్రి వారి కాళ్ల మీద పడి బ్రతిమలాడాల్సి వచ్చిందని వారు ఆవేదన వ్యక్తం చేశారు. భూపేంద్ర, శ్వేతను కుటుంబ సభ్యుల నుండి బలవంతంగా కారులో లాక్కుని తీసుకెళ్లారని తెలిపారు.
నిరంతర వేధింపులు: భూపేంద్ర ప్రతిరోజూ శ్వేతను మానసిక వేధింపులకు గురిచేసేవాడని, అత్తగారు కూడా బంధువులతో కలిసి శ్వేతను నిరంతరం అవమానించేవారని కుటుంబ సభ్యులు చెప్పారు. నోయిడాలో ఉంటున్న శ్వేత మరిదలు కూడా ఆమెపై సోషల్ మీడియా వేదికగా అసభ్యకరమైన వ్యాఖ్యలు చేసేవారని ఆరోపించారు. హెచ్డిఎఫ్సి బ్యాంక్లో పనిచేసే శ్వేతను, పెళ్లి తర్వాత ఉద్యోగం మానేయాలని బలవంతం చేశారని, ఇంటికే పరిమితం చేసి, తన తల్లిదండ్రులతో మాట్లాడకుండా కఠిన నిఘా ఉంచారని వారు పేర్కొన్నారు.
పోలీసు దర్యాప్తు: చనిపోవడానికి గంట ముందు కూడా శ్వేత తన సోదరితో సాధారణంగానే మాట్లాడిందని, అప్పుడు ఏమీ తేడాగా కనిపించలేదని కుటుంబ సభ్యులు తెలిపారు. శ్వేత కుటుంబ సభ్యులు లక్నో పోలీసులకు ఫిర్యాదు చేయడంతో, భర్త భూపేంద్ర సింగ్, అతని తండ్రి కౌశలేంద్ర సింగ్లను పోలీసులు అరెస్టు చేశారు.
మొత్తం కుటుంబంపై (భర్త, అత్తామామలు, మరిది, ఆడపడుచు) భారతీయ న్యాయ సంహితలోని సెక్షన్ 80 (కట్న మరణం) మరియు సెక్షన్ 85 (క్రూరత్వం) కింద కేసు నమోదు చేశారు. పోస్ట్మార్టం నివేదికలో ఆమె ఉరి వేసుకోవడం వల్లే మరణించిందని ధృవీకరించారు. నిందితులను విచారిస్తున్నామని పోలీసులు వెల్లడించారు.