సహారన్‌పూర్: ఉత్తరప్రదేశ్ సహారన్‌పూర్ జిల్లా మెజిస్ట్రేట్ మనీష్ బన్సల్ చారిత్రాత్మక నిర్ణయం తీసుకున్నారు. గ్యాంగ్ లీడర్ మొహమ్మద్ ఇక్బాల్ అక్రమంగా సంపాదించిన 56 ఆస్తులను జప్తు చేయాలని ఆదేశించారు. జిల్లా చరిత్రలోనే ఇది అతిపెద్ద పరిపాలనాపరమైన చర్య.
ఈ చర్యను ఉత్తరప్రదేశ్ గ్యాంగ్‌స్టర్ మరియు సామాజిక వ్యతిరేక కార్యకలాపాల (నివారణ) చట్టం 1986, సెక్షన్ 14(1) కింద చేపట్టారు. జప్తు చేసిన ఆస్తుల నిర్వహణ కోసం బెహత్ తహసీల్దార్‌ను అడ్మినిస్ట్రేటర్‌గా నియమించారు.
హాజీ ఇక్బాల్‌పై 50కి పైగా కేసులు
విచారణలో తేలిన అంశాల ప్రకారం.. మొహమ్మద్ ఇక్బాల్ తన గ్యాంగ్ సభ్యులతో కలిసి వ్యవస్థీకృత నేరాలకు పాల్పడ్డాడు. అడవుల నుండి కలప స్మగ్లింగ్, అక్రమ మైనింగ్, ప్రజలను భయభ్రాంతులకు గురిచేయడం మరియు ఫోర్జరీ ద్వారా ప్రభుత్వ, ప్రైవేట్ భూములను కబ్జా చేసి భారీగా ఆస్తులు కూడబెట్టాడు. ఇక్బాల్‌పై వివిధ రాష్ట్రాల్లో సుమారు 50 క్రిమినల్ కేసులు నమోదయ్యాయి. ప్రస్తుతం జప్తు చేసిన ఆస్తుల మార్కెట్ విలువ సుమారు 276 కోట్ల రూపాయలుగా అంచనా వేస్తున్నారు.
BSP హయాంలో MLCగా చక్రం తిప్పాడు
అబ్దుల్ వహీద్ కుమారుడైన మొహమ్మద్ ఇక్బాల్, గతంలో బహుజన్ సమాజ్ పార్టీ (BSP) అధికారంలో ఉన్న సమయంలో అక్రమ మైనింగ్ ద్వారా బినామీ ఆస్తులను సంపాదించాడు. తన పలుకుబడిని పెంచుకోవడానికి డబ్బు బలంతో BSP నుండి MLC (శాసన మండలి సభ్యుడు) అయ్యాడు. ఆ తర్వాత తన తమ్ముడు మహమూద్ అలీని కూడా MLCని చేశాడు. ఆ సమయంలో మంత్రులు, అధికారులు సైతం ఇక్బాల్ ఇంటి ముందు క్యూ కట్టేవారు.
అక్రమ మైనింగ్ నుండి భూకబ్జాల వరకు
కేవలం మైనింగ్‌కే పరిమితం కాకుండా, ఇక్బాల్ భూకబ్జాదారుడిగా మారాడు. తప్పుడు కేసులు పెట్టిస్తానని బెదిరించి సామాన్యుల భూములను లాక్కున్నాడు. ఆస్తి మరియు అధికార గర్వంతో సహారన్‌పూర్ జిల్లాలో ఒక భయంకరమైన గ్యాంగ్‌స్టర్‌గా ఎదిగాడు. ప్రస్తుతం ప్రభుత్వం తీసుకున్న ఈ చర్య వ్యవస్థీకృత నేరగాళ్లకు ఒక గట్టి హెచ్చరిక అని అధికారులు పేర్కొన్నారు.