ముజఫర్‌పూర్ జిల్లా ఔరాయ్ ప్రాంతంలో వయస్సు, మతం మరియు సమాజ కట్టుబాట్లను కాదని ఒక ప్రేమ జంట పెళ్లి చేసుకున్నారు. ఒక ప్రైవేట్ పాఠశాల నడుపుతున్న 60 ఏళ్ల రాకేష్ షా, అదే పాఠశాలలో టీచర్‌గా పనిచేస్తున్న 28 ఏళ్ల షైస్తా పర్వీన్‌తో కలిసి పారిపోయి వివాహం చేసుకున్నారు.
నేపాల్‌లోని ఒక ఆలయంలో దేవుడి సాక్షిగా వీరు దండలు మార్చుకున్న ఫోటోలు, వీడియోలు సోషల్ మీడియాలో విపరీతంగా వైరల్ అవుతున్నాయి. కాగా, షైస్తా కుటుంబ సభ్యులు రాకేష్‌పై తీవ్ర ఆరోపణలు చేస్తూ పోలీసులకు ఫిర్యాదు చేశారు.
అసలేం జరిగింది? రాకేష్ షా ఔరాయ్‌లో పాఠశాల నడుపుతుండగా, షైస్తా అక్కడ ఉపాధ్యాయురాలిగా చేరారు. వీరిద్దరి మధ్య పరిచయం ప్రేమగా మారింది. ఫిబ్రవరి 18న వీరిద్దరూ అకస్మాత్తుగా అదృశ్యమయ్యారు. సరిహద్దు దాటి నేపాల్ వెళ్లి హిందూ సంప్రదాయం ప్రకారం పెళ్లి చేసుకున్నట్లు తెలుస్తోంది.
వైరల్ వీడియోలో స్పందించిన ఉపాధ్యాయురాలు: వైరల్ అవుతున్న వీడియోలో షైస్తా పర్వీన్ మాట్లాడుతూ.. తాను తన ఇష్టపూర్వకంగానే ఈ వివాహం చేసుకున్నానని, తన కొత్త జీవితంతో సంతోషంగా ఉన్నానని స్పష్టం చేశారు. తన భర్త (రాకేష్) కుటుంబాన్ని ఎవరూ ఇబ్బంది పెట్టవద్దని ఆమె కోరారు. తనను ఎవరూ కిడ్నాప్ చేయలేదని ఆమె వివరించారు.
కిడ్నాప్ కేసు నమోదు చేసిన సోదరుడు: మరోవైపు, షైస్తా సోదరుడు ఔరాయ్ పోలీస్ స్టేషన్‌లో ఫిర్యాదు చేశారు. నలుగురు పిల్లల తండ్రి అయిన రాకేష్ షా, తన సోదరిని మతం మార్చాలనే ఉద్దేశంతో కిడ్నాప్ చేశాడని ఆయన ఆరోపించారు. ఈ ఫిర్యాదులో రాకేష్ భార్య, కుమార్తె సహా ఏడుగురి పేర్లను చేర్చారు.
గ్రామంలో ఉద్రిక్తత: రెండు వేర్వేరు వర్గాలకు చెందిన వారు కావడంతో గ్రామంలో ఉద్రిక్త వాతావరణం నెలకొంది. పాఠశాల మరియు రాకేష్ ఇంటికి తాళాలు వేసి ఉన్నాయి. పోలీసులు వీడియోల నిజానిజాలను విచారిస్తున్నారని, గ్రామంలో భారీగా పోలీసు బందోబస్తు ఏర్పాటు చేశామని ఎస్ఐ రాజా సింగ్ తెలిపారు.