మహారాష్ట్రలోని కల్యాణ్‌కు చెందిన 30 ఏళ్ల బ్యాంక్ ఉద్యోగి, వీధి కుక్క కరిచిన తర్వాత తనకు రేబిస్ సోకుతుందనే విపరీతమైన భయంతో ఆదివారం ఆత్మహత్య చేసుకున్నారు.
మృతుడు అయాస్ విశ్వనాథ్ అమిన్, కల్యాణ్ ఈస్ట్‌లోని తిస్‌గావ్ నాకా ప్రాంతంలో తన కుటుంబంతో కలిసి నివసించేవారు. ఆయన గత ఎనిమిదేళ్లుగా భరత్ బ్యాంక్ థానే బ్రాంచ్‌లో పనిచేస్తున్నారని పి.టి.ఐ (PTI) వార్తా సంస్థ తెలిపింది.
కొద్దిరోజుల క్రితం అయాస్‌ను ఒక వీధి కుక్క కరిచింది. అతను యాంటీ-రేబిస్ వ్యాక్సినేషన్ ప్రక్రియను ప్రారంభించినప్పటికీ, ఇటీవల అతను తీవ్రమైన ఆందోళనకు గురయ్యాడని, వైరస్ లక్షణాలు తనలో కనిపిస్తున్నాయని భ్రమపడ్డాడని కుటుంబ సభ్యులు తెలిపారు. ఘటనా స్థలంలో లభించిన ఆత్మహత్య లేఖలో, ఈ భయమే తన మరణానికి కారణమని ఆయన స్పష్టంగా పేర్కొన్నారు.
కుటుంబ సభ్యులు పోలీసులకు తెలిపిన వివరాల ప్రకారం.. కుక్క కరిచిన తర్వాత అమిన్ కేవలం ఒక ఇంజక్షన్ మాత్రమే తీసుకున్నారు. ఆ తర్వాత అతని ప్రవర్తనలో మార్పులు వచ్చాయని, ఆరోగ్యంపై ఆందోళన పెరిగిందని వారు చెప్పారు. పోలీసులు దీనిని ప్రమాదవశాత్తు మరణంగా కేసు నమోదు చేసి దర్యాప్తు చేస్తున్నారు.