30 ఏళ్లు జైలు జీవితమే గతి..! 105 ఏళ్ల వయసులో విముక్తి.. యావజ్జీవ శిక్షను పూర్తిగా రద్దు చేసి వృద్ధుడికి స్వేచ్ఛ ప్రసాదించిన సుప్రీంకోర్టు.. ఏం జరిగింది..?

పశ్చిమ బెంగాల్‌లోని మాల్దా జిల్లాకు చెందిన రసిక్ చంద్ర మోండల్‌కు, ఒక హత్య కేసులో 1994లో యావజ్జీవ కారాగార శిక్ష పడింది.

1988లో ఆస్తి తగాదాల కారణంగా తన స్వంత సోదరుడైన సురేష్ మోండల్‌ను హత్య చేశారనే ఆరోపణపై ఆయనపై కేసు నమోదైంది. ఈ కేసులో 1994లో కోర్టు ఆయనకు యావజ్జీవ శిక్ష విధించింది. అప్పటి నుండి దాదాపు 30 ఏళ్లకు పైగా ఆయన జైలు జీవితాన్ని గడిపారు. తీవ్ర వయోభారం, అనారోగ్య సమస్యల కారణంగా తనను ముందస్తుగా విడుదల చేయాలని కోరుతూ ఆయన కోర్టును ఆశ్రయించారు.

తన శిక్షను రద్దు చేసి విడుదల చేయాలంటూ రసిక్ చంద్ర మోండల్ సుప్రీంకోర్టులో పిటిషన్ దాఖలు చేశారు. 2020లో ఆయనకు 99 ఏళ్ల వయసు ఉన్నప్పుడు ఈ అభ్యర్థనను న్యాయస్థానం ముందు ఉంచారు. ఆయన వయస్సు, వృద్ధాప్య సంబంధిత ఆరోగ్య సమస్యలను పరిగణనలోకి తీసుకున్న సర్వోన్నత న్యాయస్థానం, 2024 నవంబర్ 29న ఆయనకు మధ్యంతర బెయిల్ (పరోల్) మంజూరు చేసింది. దీంతో ఆయన జైలు నుంచి బయటకు వచ్చారు.

ఈ క్రమంలో, ఈ కేసు మరోసారి సుప్రీంకోర్టు ధర్మాసనం ఎదుట విచారణకు వచ్చింది. 105 ఏళ్ల రసిక్ చంద్ర మోండల్ ప్రస్తుత వయస్సు, ఆరోగ్య పరిస్థితిని దృష్టిలో ఉంచుకుని ఈ కేసును ముగిస్తున్నట్లు జస్టిస్ సూర్యకాంత్ నేతృత్వంలోని ధర్మాసనం ప్రకటించింది. అంతేకాకుండా, ఆయన యావజ్జీవ శిక్షా కాలంలో ఇంకేదైనా వ్యవధి మిగిలి ఉన్నప్పటికీ, ఇకపై ఆయనను మళ్లీ జైలుకు పంపకూడదని కోర్టు స్పష్టం చేసింది. దీని ద్వారా 2024లో ఇచ్చిన మధ్యంతర బెయిల్‌ను శాశ్వతంగా మారుస్తూ నిర్ణయం తీసుకుంది.

దీంతో 105 ఏళ్ల రసిక్ చంద్ర మోండల్ తన జీవితపు చరమాంకాన్ని కుటుంబ సభ్యులతో స్వేచ్ఛగా గడిపే అవకాశం దక్కింది. హత్య కేసులో జీవిత ఖైదు పడినప్పటికీ, ఆయన అనుభవించిన సుదీర్ఘ జైలు జీవితం, వయోభారం మరియు ఆరోగ్య కారణాలను దృష్టిలో ఉంచుకుని సుప్రీంకోర్టు ఈ మానవతా దృక్పథంతో కూడిన తీర్పును వెలువరించింది. 2018లో కలకత్తా హైకోర్టు ఆయన ముందస్తు విడుదల పిటిషన్‌ను తిరస్కరించినప్పటికీ, తాజాగా సుప్రీంకోర్టు ఇచ్చిన తుది తీర్పుతో ఆయన మళ్లీ జైలు గడప తొక్కాల్సిన అవసరం లేకుండా పోయింది.