టీ20 ప్రపంచకప్ ఫైనల్ మ్యాచ్‌లో న్యూజిలాండ్ జట్టు 3వ ఓవర్‌లో తీసుకున్న ఒక తప్పుడు నిర్ణయం భారత జట్టుకు అనుకూలంగా మారింది. దీనిని అందిపుచ్చుకున్న సంజూ శాంసన్ మరియు అభిషేక్ శర్మ తమపై ఉన్న ఒత్తిడిని తగ్గించుకుని స్వేచ్ఛగా ఆడారు.
ఈ కీలక పోరులో టాస్ గెలిచిన కివీస్ కెప్టెన్ మిచెల్ సాంట్నర్ ముందుగా బౌలింగ్ ఎంచుకున్నాడు. భారత్ తరఫున అభిషేక్ శర్మ, సంజూ శాంసన్ ఇన్నింగ్స్ ప్రారంభించారు. కివీస్ బౌలర్ మాట్ హెన్రీ వేసిన మొదటి ఓవర్‌లో బంతి బాగా స్వింగ్ అవుతుండటంతో సంజూ చాలా జాగ్రత్తగా ఆడాడు. అయితే అదే ఓవర్ 5వ బంతికి సంజూ ఒక అద్భుతమైన సిక్సర్ బాదాడు.
కెప్టెన్ సాంట్నర్ వ్యూహాత్మక తప్పిదం: రెండవ ఓవర్‌లో గ్లెన్ ఫిలిప్స్ బౌలింగ్‌కు రాగా, భారత ఓపెనర్లు రిస్క్ తీసుకోకుండా కేవలం 5 పరుగులు మాత్రమే తీశారు. మూడవ ఓవర్‌లో మళ్లీ మాట్ హెన్రీ బౌలింగ్‌కు వస్తాడని అందరూ భావించారు. కానీ సాంట్నర్ అనూహ్యంగా జాకబ్ డఫీని బౌలింగ్‌కు దించాడు. దీనిని అనుకూలంగా మార్చుకున్న సంజూ-అభిషేక్ జంట 3 ఫోర్లతో సహా ఆ ఓవర్‌లో 15 పరుగులు రాబట్టారు.
అక్కడితో ఆగకుండా 4వ ఓవర్‌లో ఫెర్గూసన్‌ను రంగంలోకి దించగా, ఆ ఓవర్‌లో 2 సిక్సర్లు, 2 ఫోర్లతో ఏకంగా 24 పరుగులు పిండుకున్నారు. మొదటి రెండు ఓవర్లలో కేవలం 12 పరుగులు మాత్రమే చేసిన భారత్, తర్వాతి రెండు ఓవర్లలో 39 పరుగులు సాధించింది. మొదటి 4 ఓవర్లలో నలుగురు వేర్వేరు బౌలర్లను ఉపయోగించడం సాంట్నర్ చేసిన అతిపెద్ద తప్పుగా మారింది. పిచ్‌పై ఉన్న స్వింగ్‌ను హెన్రీ ఉపయోగించుకోకుండా అతడిని అటాక్ నుండి తప్పించడం భారత్‌కు కలిసివచ్చింది.