మధ్యప్రాచ్య యుద్ధం నాలుగో వారంలోకి ప్రవేశించింది. రోజురోజుకూ దాడులు తీవ్రమవుతున్నాయి. ఈ క్రమంలోనే అమెరికా-ఇజ్రాయెల్ దళాలకు త్వరలోనే ఒక ‘సర్ ప్రైజ్’ (ఆశ్చర్యం) ఎదురుకాబోతోందని హెచ్చరించిన ఇరాన్ ఉన్నత సైనిక అధికారిని ఇజ్రాయెల్ మట్టుబెట్టింది. ఆయన హెచ్చరికలు చేసిన కొన్ని గంటల్లోనే ఇజ్రాయెల్ ఈ ఆపరేషన్‌ను పూర్తి చేసింది.
ఫిబ్రవరి 28న ఇరాన్‌పై అమెరికా-ఇజ్రాయెల్ సంయుక్తంగా దాడులు ప్రారంభించాయి. మొదటి రోజే ఇరాన్ సుప్రీం లీడర్ ఖమేనీ మరణించడంతో యుద్ధం త్వరగా ముగుస్తుందని అందరూ భావించారు. కానీ దానికి భిన్నంగా యుద్ధం వారాల తరబడి కొనసాగుతోంది. ఇరాన్ ఎదురుదాడి చేస్తూనే ఉంది. మరోవైపు ఇజ్రాయెల్ ఇరాన్‌కు చెందిన అగ్రశ్రేణి నాయకులను వరుసగా ఏరివేస్తోంది.
హెచ్చరిక మరియు మరణం: ఇరాన్ రివల్యూషనరీ గార్డ్స్ (IRGC) సీనియర్ అధికారి మరియు అధికార ప్రతినిధి అయిన అలీ మహమ్మద్ నైనీ, అమెరికా-ఇజ్రాయెల్ వైమానిక దాడుల్లో మరణించారు. గల్ఫ్ ప్రాంతంలో అమెరికా నౌకాదళానికి సవాలు విసురుతూ, “శత్రువులకు ఒక సర్ ప్రైజ్ వేచి ఉంది” అని ఆయన హెచ్చరించిన కొద్ది గంటల్లోనే ఈ దాడి జరిగింది. ఈ మరణాన్ని ఇరాన్ వర్గాలు కూడా ధ్రువీకరించాయి.
చనిపోయే ముందు బ్రిగేడియర్ జనరల్ నైనీ విడుదల చేసిన చివరి ప్రకటనలో ఇజ్రాయెల్ ప్రధాని నెతన్యాహును ఎద్దేవా చేశారు. ఇరాన్ ఇకపై యురేనియంను శుద్ధి చేయలేదని లేదా బాలిస్టిక్ క్షిపణులను తయారు చేయలేదని నెతన్యాహు చేసిన వ్యాఖ్యలను నైనీ తోసిపుచ్చారు. యుద్ధం జరుగుతున్నప్పటికీ ఇరాన్ క్షిపణి సాంకేతికత అత్యున్నత స్థాయిలో ఉందని ఆయన పేర్కొన్నారు.
ట్రంప్‌కు సవాలు: ఇరాన్ నౌకాదళం నాశనమైందని అమెరికా అధ్యక్షుడు డొనాల్డ్ ట్రంప్ చేసిన ప్రకటనను కూడా నైనీ ఖండించారు. ధైర్యం ఉంటే అమెరికా యుద్ధనౌకలను గల్ఫ్ ప్రాంతానికి పంపాలని, అప్పుడు ఇరాన్ నౌకాదళం శక్తి ఏమిటో తెలుస్తుందని సవాలు విసిరారు. ఆయన ఈ ప్రకటన విడుదల చేసిన 4 గంటల లోపే ఇజ్రాయెల్ ఆయనను లక్ష్యంగా చేసుకుని దాడి చేసింది. బహిరంగంగా సవాలు విసిరినందుకే అమెరికా-ఇజ్రాయెల్ ఆయనను చంపేశాయని ఇరాన్ ఆరోపించింది.