ముంబైలోని మలాడ్ ప్రాంతంలో షాకింగ్ ఘటన వెలుగులోకి వచ్చింది. 80 ఏళ్ల వృద్ధుడి మృతదేహాన్ని ఆయన కుటుంబ సభ్యులు ఏకంగా నాలుగేళ్ల పాటు ఫ్రీజర్‌లో భద్రపరిచారు. భవిష్యత్తులో వైద్య శాస్త్రం మరింత అభివృద్ధి చెందినప్పుడు ఆయనను తిరిగి బతికించవచ్చనే నమ్మకంతో ఈ విధంగా చేసినట్లు తెలుస్తోంది.
సంబంధిత సమాచారం ప్రకారం.. క్యాన్సర్, కిడ్నీ వైఫల్యంతో బాధపడుతున్న ఆ వృద్ధుడు 2022లో సహజ మరణం చెందారు. అయితే ఆయన కుటుంబ సభ్యులు, ముఖ్యంగా న్యాయవాదిగా పనిచేస్తున్న ఆయన కుమార్తె.. ఆయన మరణాన్ని అంగీకరించలేకపోయారు.
భవిష్యత్తులో అమెరికాలోని క్రయోనిక్స్ కేంద్రానికి మృతదేహాన్ని తరలించి, అత్యాధునిక సాంకేతికతతో భద్రపరచాలని కుటుంబం భావించింది. అప్పటివరకు మృతదేహాన్ని తమ ఇంట్లోనే ప్రత్యేక ఫ్రీజర్‌లో ఉంచారు. అయితే అపార్ట్‌మెంట్ వాసుల నుంచి అభ్యంతరాలు రావడంతో మలాడ్‌లోని ఒక మూసివేసిన డే-కేర్ సెంటర్‌కు ఫ్రీజర్‌తో సహా మృతదేహాన్ని తరలించినట్లు సమాచారం.
మృతదేహాన్ని ఫ్రీజర్‌లో భద్రపరచడానికి కుటుంబం నెలకు సుమారు రూ.1.30 లక్షలు ఖర్చు చేసినట్లు తెలుస్తోంది. నాలుగేళ్లలో ఈ ఖర్చు రూ.50 లక్షలకు పైగా చేరినట్లు సమాచారం.
అయితే ఈ విషయం ఇంతకాలం బయటకు రాలేదు. ఓ రాపిడో డెలివరీ ఉద్యోగి ద్వారా ఈ వ్యవహారం వెలుగులోకి వచ్చింది. అనుమానాస్పదంగా కనిపించిన ఓ పార్సల్ విషయంలో స్థానికులు, డెలివరీ ఉద్యోగి మధ్య వివాదం తలెత్తింది. ఆ పార్సల్‌కు సంబంధించిన చిరునామాలో పోలీస్ స్టేషన్‌తో పాటు డే-కేర్ సెంటర్ వివరాలు ఉండటంతో పోలీసులకు సమాచారం అందింది.
పోలీసులు పార్సల్‌ను పరిశీలించగా, అందులో ఉన్న లేఖలో డే-కేర్ సెంటర్‌లోని ఫ్రీజర్‌లో వృద్ధుడి మృతదేహాన్ని ఉంచిన విషయం గురించి వివరాలు ఉన్నట్లు గుర్తించారు.
దీంతో పోలీసులు వెంటనే డే-కేర్ సెంటర్ నిర్వాహకుడిని పిలిపించి ఫ్రీజర్‌ను తెరిచి పరిశీలించారు. అందులో నాలుగేళ్లుగా భద్రపరిచిన వృద్ధుడి మృతదేహం కనిపించడంతో పోలీసులు కూడా షాక్‌కు గురయ్యారు.
అనంతరం కుటుంబ సభ్యులను పిలిపించిన పోలీసులు వారితో మాట్లాడారు. మృతదేహాన్ని ఇలాగే ఉంచడం సాధ్యం కాదని, సంప్రదాయబద్ధంగా అంత్యక్రియలు నిర్వహించాల్సిన అవసరం ఉందని వారికి వివరించారు.
చివరకు కుటుంబ సభ్యులు అంగీకరించడంతో నాలుగేళ్లుగా ఫ్రీజర్‌లో భద్రపరిచిన 80 ఏళ్ల వృద్ధుడి మృతదేహానికి బుధవారం అంత్యక్రియలు నిర్వహించి ఖననం చేశారు.
భవిష్యత్తులో శాస్త్ర, సాంకేతిక పరిజ్ఞానం అభివృద్ధి చెంది మృతులను తిరిగి బతికించవచ్చనే నమ్మకంతో ఓ కుటుంబం నాలుగేళ్ల పాటు మృతదేహాన్ని భద్రపరిచిన ఘటన ఇప్పుడు తీవ్ర చర్చనీయాంశంగా మారింది.
Leave a Reply