దులీప్ ట్రోఫీ 2026 తొలి సెమీఫైనల్ మ్యాచ్‌లో, క్రికెట్ ప్రపంచాన్ని ఆకర్షించిన యువ సంచలనం వైభవ్ సూర్యవంశీ తన మెరుపు బ్యాటింగ్‌తో మరోసారి అందరి దృష్టినీ తనవైపు తిప్పుకున్నాడు.
ఈస్ట్ జోన్ జట్టు తరఫున ఆడుతున్న ఈ యువ ఆటగాడు, 159 పరుగుల సులువైన విజయలక్ష్యాన్ని ఛేదించే క్రమంలో తన దూకుడును ప్రదర్శించాడు.
తొలి ఇన్నింగ్స్‌లో కేవలం 81 బంతుల్లోనే 92 పరుగులు చేసి ప్రత్యర్థిని హడలెత్తించిన వైభవ్ సూర్యవంశీ, రెండో ఇన్నింగ్స్‌లోనూ ఆరంభం నుంచే అద్భుతమైన ఫామ్‌ను కనబరిచాడు. అనుభవజ్ఞుడైన అభిమన్యు ఈశ్వరన్‌తో కలిసి తొలి వికెట్‌కు 61 పరుగులు జోడించి జట్టుకు బలమైన పునాది వేశాడు.
మొదట్లో ఆచితూచి ఆడుతూ 37 బంతుల్లో 22 పరుగులు చేసిన అతను, ఇన్నింగ్స్ 14వ ఓవర్‌లో పేసర్ యశ్ ఠాకూర్ బౌలింగ్‌లో తన విశ్వరూపాన్ని చూపించాడు. ఆ ఓవర్ మొదటి బంతికి ఫోర్, రెండో బంతికి భారీ సిక్సర్ బాదిన వైభవ్.. ఆ తర్వాతి రెండు బంతుల్లోనూ వరుసగా బౌండరీలు కొట్టి తొలి 4 బంతుల్లోనే 18 పరుగులు పిండుకున్నాడు.
అదే ఓవర్ ఐదో బంతి డాట్ అవ్వగా, ఆరో బంతికి కూడా భారీ షాట్ ఆడబోయిన వైభవ్.. బౌండరీ లైన్ వద్ద రజత్ పటీదార్‌కు క్యాచ్ ఇచ్చి పెవిలియన్ చేరాడు. దీంతో అతను అర్ధశతకం చేసే అవకాశాన్ని తృటిలో చేజార్చుకున్నాడు. అయినప్పటికీ, అతను 43 బంతుల్లో 3 ఫోర్లు, 2 సిక్సర్లతో 40 పరుగులు చేసి జట్టు విజయంలో కీలక పాత్ర పోషించాడు.
అంతకుముందు జరిగిన క్వార్టర్ ఫైనల్ మ్యాచ్‌లో నార్త్ జోన్‌పై కేవలం 8 పరుగులు మాత్రమే చేసి నిరాశపరిచిన వైభవ్ సూర్యవంశీపై.. రెడ్-బాల్ క్రికెట్‌లో తన సత్తా చాటాల్సిన తీవ్రమైన ఒత్తిడి ఉండింది. కానీ, ఈ సెమీఫైనల్ మ్యాచ్ రెండు ఇన్నింగ్స్‌లలోనూ భారీగా పరుగులు సాధించి, ఎర్ర బంతి క్రికెట్‌లోనూ తాను ప్రమాదకరమైన ఆటగాడినని అతను మరోసారి నిరూపించుకున్నాడు.