ప్రముఖ పారిశ్రామికవేత్త ఎలాన్ మస్క్, షివోన్ జిలిస్ మధ్య కొనసాగుతున్న ప్రేమ బంధం అకస్మాత్తుగా ముగిసిపోయిందంటూ షివోన్ జిలిస్ స్వయంగా సోషల్ మీడియా వేదికగా వెల్లడించారు.
అక్టోబర్ 2న ఆమె పెట్టిన పోస్ట్‌లో.. “ప్రేమలో మునిగితేలుతున్న స్థితి నుంచి కేవలం ఒక్క వారంలోనే విడిపోవడం, అది కూడా ఎలాంటి ముందస్తు సంకేతం లేకుండా జరగడం ఎంతో బాధాకరమైన విషయం” అని తన ఆవేదన వ్యక్తం చేశారు. అదే సమయంలో, తమ ఇద్దరి ద్వారా జన్మించిన నలుగురు పిల్లల పట్ల తాను ఎల్లప్పుడూ కృతజ్ఞతతో ఉంటానని.. ఇకపై తామిద్దరం మంచి స్నేహితులుగా ఉంటూ, పిల్లల బాధ్యతలను కలిసి పంచుకునే తల్లిదండ్రులుగా (కో-పేరెంటింగ్) ముందుకు సాగాలని కోరుకుంటున్నట్లు ఆమె పేర్కొన్నారు.
ఈ విడిపోవడానికి కొద్ది రోజుల ముందు కూడా వారిద్దరి మధ్య ఎంతో ఆత్మీయమైన సంభాషణలు సాగినట్లు స్పష్టమవుతోంది. సెప్టెంబర్ 24న జరిగినట్లుగా చెబుతున్న చాట్ స్క్రీన్‌షాట్‌ను షివోన్ పంచుకున్నారు. అందులో ఆమె మస్క్‌పై ప్రేమను వ్యక్తపరచగా, ఆయన కూడా అంతే ప్రేమగా స్పందించినట్లు వార్తలు వస్తున్నాయి. వారం రోజుల క్రితం వరకు ఎంతో అన్యోన్యంగా ఉన్న బంధం ఇంత హఠాత్తుగా ముగిసిపోవడం షివోన్‌ను తీవ్రంగా కలచివేసింది. అయితే, ఈ బ్రేకప్‌కు దారితీసిన అసలు కారణాలపై మస్క్ వైపు నుంచి ఇప్పటివరకు ఎలాంటి అధికారిక ప్రకటన రాలేదు.
షివోన్ జిలిస్, ఎలాన్ మస్క్ దంపతులకు నలుగురు సంతానం ఉన్నారు. 2021లో స్ట్రైడర్, అజూర్ అనే కవలలు జన్మించారు. ఆ తర్వాత 2024లో ఆర్కేడియా అనే కుమార్తె, 2025లో సెల్డన్ అనే కుమారుడు జన్మించారు. వీరిద్దరూ వివాహం చేసుకోలేదు. వీరి సంబంధం, పిల్లల గురించిన విషయాలు చాలా కాలం పాటు అత్యంత గోప్యంగా ఉన్నాయి. 2022లోనే వీరికి కవల పిల్లలు ఉన్న విషయం తొలిసారిగా ప్రపంచానికి తెలిసింది.
సాంకేతిక రంగంలో షివోన్ జిలిస్ ఒక ప్రముఖ ఎగ్జిక్యూటివ్‌గా గుర్తింపు పొందారు. ఆమె గతంలో ఓపెన్ ఏఐ (OpenAI) లో పనిచేయడంతో పాటు, మస్క్‌కు చెందిన న్యూరాలింక్ (Neuralink) సంస్థలో కీలక బాధ్యతలను నిర్వర్తించారు. గతంలో నిఖిల్ కామత్ పాడ్‌కాస్ట్‌లో పాల్గొన్న సందర్భంలో.. షివోన్ సగం భారతీయ సంతతికి చెందినవారని, చిన్నతనంలో దత్తతకు వెళ్లి కెనడాలో పెరిగారని స్వయంగా ఎలాన్ మస్క్ వెల్లడించారు.
ప్రస్తుతం బంధం ముగిసినప్పటికీ, పిల్లల భవిష్యత్తు కోసం తమ మధ్య సామరస్యపూర్వకమైన వాతావరణం కొనసాగాలనేది షివోన్ అభిమతంగా కనిపిస్తోంది. “ఈ పరిణామం నన్ను తీవ్రంగా గాయపరిచింది; అయినప్పటికీ ఎలాన్ బాగుండాలని నేను మనస్ఫూర్తిగా కోరుకుంటున్నాను, అతను సంతోషంగా జీవించాలి” అని ఆమె తన పోస్ట్‌లో భావోద్వేగంగా రాసుకొచ్చారు. దీంతో ఎలాన్ మస్క్ – షివోన్ జిలిస్ రిలేషన్‌షిప్ ఆకస్మిక ముగింపు ప్రస్తుతం సోషల్ మీడియాలో హాట్ టాపిక్‌గా మారింది.
Leave a Reply