డెవిడ్ మిల్లర్ను ఎందుకు ‘కిల్లర్ మిల్లర్’ అని పిలుస్తారో ఆయన మరోసారి నిరూపించారు. చిన్నస్వామి స్టేడియంలో జరిగిన ఉత్కంఠభరిత పోరులో ఢిల్లీ క్యాపిటల్స్ 6 వికెట్ల తేడాతో రాయల్ ఛాలెంజర్స్ బెంగళూరు (RCB) పై విజయం సాధించి, వారి ఆశలపై నీళ్లు చల్లింది.
176 పరుగుల లక్ష్య ఛేదనలో ఢిల్లీ ఆరంభం ఘోరంగా ఉంది. భువనేశ్వర్ కుమార్ ధాటికి పవర్ప్లే ముగిసేసరికి కేవలం 18 పరుగులకే 3 వికెట్లు కోల్పోయింది. అయితే, కెఎల్ రాహుల్ మరియు ట్రిస్టన్ స్టబ్స్ ఇన్నింగ్స్ను చక్కదిద్దారు. చివరి ఓవర్లో 15 పరుగులు అవసరమైన దశలో మిల్లర్పై తీవ్ర ఒత్తిడి నెలకొంది. అంతకుముందు గుజరాత్ టైటాన్స్తో జరిగిన మ్యాచ్లో ఇలాంటి పరిస్థితిలోనే మ్యాచ్ ముగించలేకపోయిన మిల్లర్, ఈసారి ఆ తప్పు చేయలేదు.
చివరి ఓవర్ మొదటి రెండు బంతులకు కేవలం 2 పరుగులే రావడంతో సమీకరణం 4 బంతుల్లో 13 పరుగులుగా మారింది. ఆ సమయంలో రోమారియో షెపర్డ్ బౌలింగ్లో మిల్లర్ రెచ్చిపోయాడు. మూడో బంతిని 87 మీటర్ల భారీ సిక్సర్గా మలిచిన మిల్లర్, నాలుగో బంతికి ఎక్స్ట్రా కవర్ మీదుగా మరో అద్భుతమైన సిక్సర్ బాదాడు. దీంతో చిన్నస్వామి స్టేడియం నిశ్శబ్దమైపోయింది. ఐదో బంతికి (19.5 ఓవర్) ఫోర్ కొట్టి జట్టుకు చిరస్మరణీయ విజయాన్ని అందించాడు. మిల్లర్ 10 బంతుల్లో 22 (నాటౌట్) పరుగులు చేయగా, స్టబ్స్ 47 బంతుల్లో 60 (నాటౌట్) పరుగులు చేశాడు.