ఐటీ రాజధానిగా పిలవబడే బెంగళూరులో వృత్తిపరమైన జీవితం వెనుక ఉన్న చేదు నిజాలను ఒక సాఫ్ట్‌వేర్ ఉద్యోగి ‘గ్రేప్‌వైన్’ (Grapevine) అనే వేదికపై పంచుకున్నారు. “బెంగళూరు వైరస్” పేరుతో రాసిన ఈ పోస్ట్ ఇప్పుడు నెట్టింట వైరల్‌గా మారింది.
ఏమిటా ‘ఆటోపైలట్ మోడ్’ జీవితం?
సంవత్సరానికి ₹30 నుండి ₹40 లక్షల వరకు భారీ జీతం పొందుతున్నప్పటికీ, జీవితంలో భావోద్వేగాలు కరువయ్యాయని ఆయన వాపోయారు. తన దినచర్యను ఇలా వివరించారు:
- “ఉదయం నిద్రలేవగానే టీమ్స్ (Teams) మెసేజ్ చెక్ చేయడం, స్టాండప్ మీటింగ్స్, రాత్రి 8 గంటల వరకు పని.”
- “ఆ తర్వాత స్విగ్గీలో ఫుడ్ ఆర్డర్, నెట్‌ఫ్లిక్స్ చూస్తూ మొబైల్ స్క్రోలింగ్, నిద్ర.. మరుసటి రోజు మళ్ళీ అదే దినచర్య.” చాలామంది జీవితం ఇలా ఒక క్రమ పద్ధతిలో ‘ఆటోపైలట్ మోడ్’లో సాగిపోతోందని, తాము ఏదో భిన్నంగా ఉన్నామని అనుకుంటున్నాం కానీ అందరి పరిస్థితి ఇదేనని ఆయన పేర్కొన్నారు.
మౌనం అంటే భయం:
ట్రాఫిక్, కాలుష్యం కంటే ఈ నగరంలో ఒంటరితనం పెద్ద సమస్య అని ఆయన గుర్తించారు.
- “హెచ్‌ఎస్‌ఆర్ లేఅవుట్, ఇందిరానగర్ వీధుల్లో చూస్తే అందరూ హెడ్‌ఫోన్స్ పెట్టుకుని తిరుగుతుంటారు. మన ఆలోచనలతో మనం ఒక 10 నిమిషాలు గడపాలంటే భయపడే పరిస్థితి వచ్చింది.”
- మౌనంగా ఉంటే మన ఉనికి గురించి మనమే ప్రశ్నలు వేసుకోవాల్సి వస్తుందనే భయంతో ఎప్పుడూ ఏదో ఒక డిజిటల్ పరధ్యానంలో మునిగిపోతున్నామని ఆయన అభిప్రాయపడ్డారు.
ఆ భారీ జీతం ఎక్కడికి పోతోంది?
₹40 లక్షల ఆదాయం ఉన్నా ఆ డబ్బు ఎక్కడికి పోతోందో తెలుసా? అని ఆయన ప్రశ్నించారు. “మనం ఆఫీసు పని కోసం కోల్పోయిన సమయాన్ని తిరిగి కొనుక్కోవడానికే (సదుపాయాల కోసం, సులభమైన జీవితం కోసం) ఆ డబ్బును ఖర్చు చేస్తున్నాం. నిజమైన బంధాలు, ప్రశాంతమైన విశ్రాంతి కంటే ‘కన్వీనియన్స్ స్పెండింగ్’ పెరిగిపోయింది.” అని విమర్శించారు.