ఉత్తరప్రదేశ్ రాష్ట్రం ఫతేపూర్ జిల్లాలో 43 ఏళ్ల క్రితం జరిగిందని చెప్పబడిన సామూహిక అత్యాచారం కేసులో ముగ్గురు వ్యక్తులను నిర్దోషులుగా విడుదల చేస్తూ అలహాబాద్ హైకోర్టు తీర్పునిచ్చింది.
1983లో నమోదైన ఈ కేసులో సిరాజుల్, ఛోటేలాల్, ఫక్కు అనే ముగ్గురు నిందితులకు దిగువ న్యాయస్థానం విధించిన శిక్షను హైకోర్టు రద్దు చేసింది. కేసులో సమర్పించిన ఆధారాలు, బాధితుల వాంగ్మూలాలలో ఉన్న పరస్పర విరుద్ధ అంశాలు, ఎఫ్‌ఐఆర్ నమోదు చేయడంలో జరిగిన తీవ్ర జాప్యాన్ని న్యాయస్థానం సమగ్రంగా పరిశీలించింది. ప్రాసిక్యూషన్ తమ అభియోగాలను నిస్సందేహంగా నిరూపించడంలో విఫలమైందని పేర్కొంటూ ఆ ముగ్గురినీ విడుదల చేసింది.
ఈ ఘటన 1983 అక్టోబర్ 17వ తేదీ రాత్రి జరిగినట్లు సమాచారం. ఫతేపూర్ జిల్లాలోని బింద్కీ ప్రాంతంలో ఉన్న ఒక ఇంట్లోకి ఆయుధాలతో చొరబడిన కొందరు వ్యక్తులు, కుటుంబ సభ్యులను బెదిరించి అనంతరం ఇద్దరు మహిళలపై సామూహిక అత్యాచారానికి పాల్పడినట్లు ఫిర్యాదులో పేర్కొన్నారు. బాధితులైన ఇద్దరు మహిళలు బంధువులేనని సమాచారం. ఘటన జరిగిన ఆరు రోజుల తర్వాత, అక్టోబర్ 23వ తేదీన పోలీస్ స్టేషన్‌లో ప్రథమ సమాచార నివేదిక (FIR) నమోదైంది. ఈ కేసును విచారించిన దిగువ కోర్టు 1985 ఏప్రిల్ 22న నిందితులను దోషులుగా నిర్ధారిస్తూ శిక్ష ఖరారు చేసింది. దీనిని సవాలు చేస్తూ నిందితులు హైకోర్టులో అప్పీల్ దాఖలు చేశారు.
అప్పీల్ విచారణ సమయంలో.. ఫిర్యాదు చేయడంలో జరిగిన జాప్యం, ఇద్దరు మహిళల వాంగ్మూలాల్లోని వైరుధ్యాలు, ఘటన జరిగిన సమయంలో ధరించిన దుస్తులను పోలీసులకు అప్పగించకపోవడం వంటి కీలక అంశాలను డిఫెన్స్ తరఫు న్యాయవాదులు ఎత్తిచూపారు. అంతేకాకుండా, పాత కక్షల కారణంగానే తమపై తప్పుడు ఆరోపణలు మోపారని వారు వాదించారు. ప్రాథమిక ఫిర్యాదులో కొందరి పేర్లు లేకపోవడం, ఆ తర్వాత వారి ప్రమేయంపై వివరాలు జోడించడం వంటి అంశాలను కూడా న్యాయస్థానం పరిగణనలోకి తీసుకుంది. సంఘటన జరిగిన తీరు, నిందితుల పాత్ర, కుటుంబ సభ్యులను బంధించినట్లు చెప్పిన విధానంలో సాక్షుల మధ్య తీవ్రమైన వైరుధ్యాలు ఉన్నాయని కోర్టు పేర్కొంది.
బాధితుల విశ్వసనీయమైన వాంగ్మూలం ఒక్కటే నిందితులను శిక్షించడానికి సరిపోతుందని, దానికి ఎల్లప్పుడూ అదనపు స్వతంత్ర సాక్ష్యాలు అవసరం లేదని హైకోర్టు స్పష్టం చేసింది. అయితే, కేసు మూలాలనే దెబ్బతీసే స్థాయిలో తీవ్రమైన వైరుధ్యాలు ఉన్నప్పుడు మాత్రం అన్ని ఆధారాలను సమగ్రంగా విశ్లేషించాల్సి ఉంటుందని స్పష్టం చేసింది. వైద్య పరీక్షల్లో బాధితుల శరీరాలపై ఎలాంటి బాహ్య లేదా అంతర్గత గాయాలు లేకపోవడాన్ని కూడా కోర్టు పరిగణించింది. గాయాలు లేనంత మాత్రాన అత్యాచారం ఆరోపణలను కొట్టిపారేయలేమని, అలాగే ఫిర్యాదులో జాప్యం జరిగినంత మాత్రాన కేసును తోసిపుచ్చలేమని కోర్టు పేర్కొన్నప్పటికీ.. ఈ కేసులో జాప్యానికి సరైన కారణం చూపకపోవడం, ఇతర ఆధారాలలో బలమైన వ్యత్యాసాలు ఉండటంతో నిందితులను విడుదల చేసింది. ప్రధాన నిందితుడైన మహ్మద్ అనీస్ ఖాన్ ఇప్పటికే మరణించడంతో, ఆయనకు సంబంధించిన అప్పీల్ 2026 మార్చి 16నే ముగిసింది.
Leave a Reply